Toronto நகர முதல்வராக Olivia Chow மீண்டும் வெற்றி பெற்றார்.
திங்கட்கிழமை (26) இந்தத் தேர்தலுக்கான இறுதி வாக்களிப்பு நடைபெற்றது.
இதில் தனது பிரதான எதிர் வேட்பாளர் Brad Bradford-டை வீழ்த்தி இரண்டாவது முறையாக Olivia Chow நகர முதல்வராக வெற்றி பெற்றார்.
கருத்துக்கணிப்புகள் இருவருக்கும் இடையே நூலிழை போட்டி தொடர்ந்து நிலவிய போதிலும், தேர்தல் இறுதி முடிவுகளில் Olivia Chow கணிசமான வாக்குகள் வித்தியாசத்தில் வெற்றியைப் பதிவு செய்துள்ளார்.
Olivia Chow-வின் வெற்றியை Scarborough, Downtown பகுதிகள் தீர்மானித்தன.
இந்தத் தேர்தல் பிரச்சார காலத்தில் Olivia Chow தனது பிரச்சாரத்தின் பெரும்பகுதியை Scarborough பகுதியில் செலவிட்டார்.
அதன் பலனாக, Scarborough-வின் அனைத்து இந்து தொகுதிகளிலும் அவர் 51 சதவீதம் முதல் 56.7 சதவீதம் வரை வாக்குகளைப் பெற்றார்.
Toronto-வின் மையப் பகுதிகளான (Downtown) Parkdale-High Park (69%), Davenport (69.3%), Toronto Centre (72.4%) ஆகிய தொகுதிகளில் Olivia Chow பெரும் வாக்கு வித்தியாசத்தில் வெற்றி பெற்றார்.
பிரதான எதிர் வேட்பாளர் Brad Bradford நகரசபை உறுப்பினராக இருந்த Beaches-East York தொகுதியில், Olivia Chow 65.4% வாக்குகளைப் பெற்று Brad Bradford-டை (31%) விட இரு மடங்கு அதிக வாக்குகளுடன் சாதனை படைத்துள்ளார்.
Brad Bradford நகரின் வடக்கு, மேற்குப் பகுதிகளில் தனது ஆதிக்கத்தை செலுத்தியுள்ளார்.
அவர் Etobicoke Centre (59%), York Centre (64.2%), Eglinton-Lawrence (62.8%), Willowdale (50.4%) ஆகிய தொகுதிகளில் மிகத் தெளிவான வெற்றியைப் பெற்றுள்ளார்.
இருப்பினும் Scarborough, Downtown பகுதிகள் Olivia Chow பெற்ற பிரம்மாண்ட வாக்குகளை அவரால் ஈடுகட்ட முடியாமல் போனது அவரது தோல்விக்குக் காரணமாக அமைந்தது.
இந்தத் தேர்தலில் இதுவரை வெளியான அதிகாரப்பூர்வமற்ற தேர்தல் முடிவுகளின்படி, Olivia Chow 529,042 வாக்குகளைப் பெற்று (சுமார் 54.2%) முதலிடத்தை பிடித்துள்ளார்.
அவரை எதிர்த்துப் போட்டியிட்ட Brad Bradford 4,01,415 வாக்குகளைப் பெற்று இரண்டாம் இடத்தைப் பிடித்துள்ளார்.
Toronto மாநகர வரலாற்றில் இந்தத் தேர்தல் ஒரு புதிய சாதனையைப் படைத்துள்ளது.
இம்முறை மொத்தம் 976,550 வாக்காளர்கள் தங்களது வாக்குகளை பதிவு செய்துள்ளனர்.
இது கடந்த 2022-ஆம் ஆண்டு பொதுத் தேர்தலில் பதிவான 563,124 வாக்குகளை விட பல மடங்கு அதிகமாகும்.
