Stellantis வாகன உற்பத்தித் தொழிற்சாலை ஊழியர்கள் வேலைநிறுத்தத்திற்கு ஆதரவாக வாக்களித்தனர்.
Stellantis தொழிற்சாலை ஊழியர்கள், தங்களது வேலை நிறுத்தப் போராட்ட திட்டத்திற்கு ஆதரவளித்து வேலை நிறுத்த அனுமதியை தொழிற்சங்கத்திற்கு வழங்கியுள்ளனர்.
Windsor நகரில் உள்ள Caesars Windsor வளாகத்தில் நடைபெற்ற மாபெரும் வாக்கெடுப்பை தொடர்ந்து தொழிற்சங்க உறுப்பினர்கள் தங்கள் உரிமைகளை பாதுகாக்கும் போராட்டத்திற்கு அதிரடி ஆதரவை வழங்கினர்.
இந்த வாக்கெடுப்பு 97 சதவீதத்திற்கும் அதிகமான ஆதரவுடன் வெற்றி பெற்றது.
கடந்த சனிக்கிழமை (17) இந்த வேலை நிறுத்த வாக்கெடுப்பு நடந்தது.
திங்கட்கிழமை (19) வெளியாகியுள்ள இறுதி முடிவுகளின்படி, 97 சதவீதத்திற்கும் அதிகமான தொழிலாளர்கள் வேலை நிறுத்தப் போராட்டத்திற்கு ஆதரவாக வாக்களித்துள்ளனர்.
இதன் மூலம், நிர்வாகம் தங்களது கோரிக்கைகளுக்கு பணிய மறுத்தால், எந்த ஒரு நொடியிலும் தொழிற்சாலையை முடக்கும் அதிகாரத்தை தொழிற்சங்க தலைமை முறைப்படி பெற்றுள்ளது.
அமெரிக்க ஜனாதிபதியின் புதிய வர்த்தக வரிகளால் கனடாவின் வாகன உற்பத்தித் துறை முடங்கி வரும் இக்கட்டான சூழ்நிலையில் இந்த வேலை நிறுத்த அச்சுறுத்தல் வெளியாகியுள்ளது.
