Ontario மாகாண முதல்வர் Doug Ford தனது அமைச்சரவையில் ஒன்பது அமைச்சர்களை மாற்றி அமைத்து அதிரடி அறிவிப்பை வெளியிட்டுள்ளார்.
Ontario மாகாணத்தில் நிலவி வரும் அரசியல், பொருளாதாரச் சூழல்களுக்கு மத்தியில், Doug Ford தனது அமைச்சரவையில் மாற்றங்களை வியாழக்கிழமை (10) அறிவித்தார்.
இந்த அமைச்சரவை மாற்றத்தில், அண்மைய காலமாக பல்வேறு புகார்களில் சிக்கிய அமைச்சர்களின் இலாகாக்கள் மாற்றப்பட்டுள்ளன.
தொழிலாளர் நலத்துறை அமைச்சராக இருந்த David Piccini, கட்டமைப்பு துறை அமைச்சராக மாற்றப்பட்டுள்ளார்.
இவர் மீது, $2.5 பில்லியன் மதிப்புள்ள திறன் மேம்பாட்டு நிதியை கையாண்டதில் முறைகேடுகள் நடந்ததாக கூறி ஒழுங்கீன ஆணையர் விசாரணை நடத்தி வரும் நிலையில் இந்த மாற்றம் அறிவிக்கப்பட்டுள்ளது.
இந்த மாற்றத்தை எதிர்க்கட்சித் தலைவர் Marit Stiles கடுமையாக கண்டித்துள்ளார்.
சர்ச்சைகளில் சிக்கியுள்ள அமைச்சரை அமைச்சரவையில் இருந்து முற்றிலும் நீக்குவதற்கு கிடைத்த இந்த வாய்ப்பை Doug Ford பயன்படுத்தியிருக்க வேண்டும் என NDP தலைவர் Marit Stiles தெரிவித்துள்ளார்.
கட்டமைப்புத் துறை அமைச்சராக இருந்த Kinga Surma, தற்போது வெற்றிடமாக உள்ள நிதி வாரியத் தலைவராக நியமிக்கப்பட்டுள்ளார்.
அண்மையில் பதவி விலகிய அமைச்சர் Stan Cho வகித்த சுற்றுலா, கலாச்சாரம், gaming அமைச்சராக Zee Hamid புதிய பொறுப்பை ஏற்றுள்ளார்.
Toronto-வில் தங்குவதற்காக விடுதிகளுக்கு $16,000 டொலர்களை செலவு செய்தது வெளிச்சத்திற்கு வந்த நிலையில் Stan Cho அமைச்சரவையில் இருந்து விலகியிருந்தார்.
Trevor Jones புதிய தொழிலாளர் நலத்துறை அமைச்சராகவும், Sam Oosterhof புதிய விவசாயத் துறை அமைச்சராகவும், Brian Saunderson புதிய விளையாட்டுத் துறை அமைச்சராகவும் வியாழனன்று பொறுப்பேற்றுள்ளனர்.
Ontario மாகாணத்தில் நிலவும் வாகனை திருட்டு சம்பவங்கள் குறைந்ததை தொடர்ந்து, வாகன திருட்டு தடுப்பு இணை அமைச்சர் பதவி முழுமையாக நீக்கப்பட்டுள்ளது.
அதற்கு மாறாக, உலகளாவிய தொழில்நுட்ப வளர்ச்சி, வேலைவாய்ப்பை கருத்தில் கொண்டு புதிய துறைகள் உருவாக்கப்பட்டுள்ளன.
அமெரிக்காவுடனான வர்த்தகப் போருக்கு மத்தியில் மாகாணத்தின் நிர்வாகத்தை வலுப்படுத்த இந்த நடவடிக்கை எடுக்கப்பட்டுள்ளது.
இதன் ஒரு பகுதியாக செயற்கை நுண்ணறிவுத் துறை புதிதாக உருவாக்கப்பட்டுள்ளது.
Ontario மாகாணத்தில் ஆண்டுதோறும் உருவாகும் 17,000 AI பட்டதாரிகளின் நலனுக்காக இப்புதிய துறை உருவாக்கப்பட்டு, அதன் இணை அமைச்சராக தமிழரான விஜய் தணிகாசலம் நியமிக்கப்பட்டுள்ளார்.
இவர் இதற்கு முன்னர் மனநலம், போதைப்பொருள் ஒழிப்பு இணை அமைச்சர் பொறுப்பில் இருந்தார்.
இவர் வகித்த இணை அமைச்சர் பதவிக்கு Michelle Cooper புதிய இணை அமைச்சராக நியமிக்கப்பட்டுள்ளார்.
தவிரவும் ஆற்றல் சார்ந்த தொழில்துறை புதிதாக உருவாக்கப்பட்டு, அதன் புதிய இணை அமைச்சராக Matthew Rae நியமிக்கப்பட்டுள்ளார்.
இந்த மாற்றங்களுடன் அமைச்சரவையில் 8 இணை அமைச்சர்கள் உட்பட மொத்தம் 37 பேர் இடம் பெற்றுள்ளனர்.
