Toronto நகர முதல்வர் போட்டியில் நீடிக்க உள்ளதாக முன்னாள் மத்திய அமைச்சர் Chris Alexander தெரிவித்தார்.
நகர முதல்வர் தேர்தலில் இருந்து தான் விலக போவதாக வெளியான செய்திகளுக்கு முற்றுப்புள்ளி வைக்கும் வகையில் அவரது இந்தக் கருத்து வெளியானது.
தான் போட்டியில் இருந்து பின்வாங்கப் போவதில்லை எனவும், இறுதிவரை தேர்தலை எதிர்கொள்ள உள்ளதாகும் அவர் உறுதிபடக் கூறியுள்ளார்.
கருத்து கணிப்பில் மூன்றாவது இடத்தில் இருக்கும் Chris Alexander, தனது வெற்றி வாய்ப்புகள் மேம்படவில்லை என்றால் போட்டியிலிருந்து விலகத் தயாராக இருப்பதாக அண்மையில் தெரிவித்திருந்தார்.
Toronto நகரில் கனடாவின் யூத வழக்கறிஞர்கள் அமைப்பு செவ்வாய்க்கிழமை (08) நடத்திய விவாத மேடையில் கேள்வி ஒன்றுக்கு பதிலளிக்கும் போதே அவர் இதனைத் தெரிவித்தார்.
தற்போதைய நகர முதல்வர் Olivia Chow-வைத் தோற்கடிப்பதற்காக நீங்கள் போட்டியிலிருந்து விலகுவீர்களா என்ற கேள்விக்கு, Chris Alexander “ஆம்” என பதிலளித்தார்.
ஆனாலும் பின்னர் அவர் தனது நிலைபாட்டை மாற்றும் வகையில் கருத்தை வெளியிட்டார்.
முன்னதாக, Conservative வேட்பாளர்களின் வாக்குகள் பிரிவதைத் தடுக்க அவர் விலகக்கூடும் என அரசியல் வட்டாரங்களில் பரவலாகப் பேசப்பட்ட நிலையில், அவரது தற்போதைய அறிவிப்பு வெளியாகியுள்ளது.
யூத வழக்கறிஞர்கள் அமைப்பின் விவாதத்தின் போது சக வேட்பாளர் Brad Bradford குறித்தும் Chris Alexander கடுமையான விமர்சனங்களை முன் வைத்தார்.
சமீபத்திய கருத்து கணிப்பு நிலவரம் Chris Alexander மூன்றாவது இடத்தில் இருப்பதாக காட்டுகிறது.
இந்த கருத்து கணிப்பு Olivia Chow-வின் ஆதரவை 50 சதவீதமாக குறிப்பிடுகிறது.
அவரது முக்கிய அரசியல் எதிர்ப்பாளர்கள் Brad Bradford 39 சதவீதம், Chris Alexander 11 சதவீதம் என ஆதரவை கொண்டுள்ளனர்.
இருப்பினும் தேர்தலில் இருந்து அதிகாரப்பூர்வமாக விலகும் எண்ணம் இல்லை எனவும், ஒரு கருத்து கணிப்பை வைத்து கொண்டு போட்டியில் இருந்து பின்வாங்கப் போவதில்லை எனவும் Chris Alexander தேர்தல் பிரச்சாரக் குழுவினர் விளக்கமளித்துள்ளனர்.
நடைபெறவுள்ள தேர்தலில் மொத்தம் 53 அங்கீகரிக்கப்பட்ட வேட்பாளர்கள் Toronto நகர முதல்வர் பதவிக்கு போட்டியிடுகின்றனர்.
இந்தத் தேர்தல் வாக்குப்பதிவு எதிர்வரும் October 26-ஆம் திகதி நடைபெறவுள்ளது.
