அமெரிக்கா வர்த்தக மோதலைத் தீவிரப்படுத்தி வரும் நிலையில், கனடா தனது அடுத்தகட்ட நடவடிக்கைகள் குறித்து பரிசீலித்து வருகிறது.
அண்மைய அமெரிக்க வரி அச்சுறுத்தல்களுக்கு பின்னர் தனது அடுத்தகட்ட நடவடிக்கைகள் குறித்து கனடா பரிசீலிக்கிறது.
கனடிய பிரதமர் Mark Carney, அமெரிக்க ஜனாதிபதி Donald Trump இடையே வர்த்தகப் பேச்சுவார்த்தைகளை தீவிரப்படுத்த ஒப்புக்கொள்ளப்பட்டுள்ளது.
CUSMA ஒப்பந்தத்தை மீறும் வகையில் கனடாவுக்கு எதிராக மேற்கொள்ளப்படும் அமெரிக்காவின் வர்த்தக நடவடிக்கைகளின் தொடர் இந்த சுங்க வரி அச்சுறுத்தல் என செவ்வாய்க்கிழமை (21) செய்தியாளர்களிடம் பேசிய Mark Carney தெரிவித்தார்.
கட்டுப்படுத்தக்கூடிய விடயங்களில் கவனம் செலுத்துவதே கனடாவின் முதன்மை நோக்கம் எனவும் அவர் வலியுறுத்தினார்.
அமெரிக்காவின் புதிய வரிகள் நடைமுறைக்கு வரும் பட்சத்தில், அதற்கான சாத்தியமான எதிர் நடவடிக்கை குறித்த வழிமுறைகளை கனடிய மத்திய அரசு ஆராயும் எனவும் பிரதமர் கூறினார்.
அமெரிக்காவின் சமீபத்திய வர்த்தக நடவடிக்கைகளுக்கு பதிலளிக்க கனடா தயாராக இருப்பதாகவும், இதனால் பாதிக்கப்படும் தொழிலாளர்கள், வணிகங்களுக்கு தொடர்ந்து ஆதரவளிக்கப்படும் எனவும் Mark Carney உறுதியளித்தார்.
அமெரிக்காவின் தொடர்ச்சியான ஒருதலைப்பட்சமான வர்த்தக நடவடிக்கைகள் குறித்து விவாதிக்க, செவ்வாயன்று மாகாண முதல்வர்களுடன் பேசியதாகவும் பிரதமர் தெரிவித்தார்.
நாம் ஒன்றுபடும் போது வலிமையானவர்களாகவும், செழிப்பானவர்களாகவும் இருக்கிறோம் என கூறிய Mark Carney, கனடா தனது உள்நாட்டு வலிமையை வளர்த்துக்கொள்ளும் எனவும் உறுதியளித்தார்.
