Roshel ஒப்பந்தத்தைத் தொடர்ந்து Stellantis நிறுவனத்திற்கு நிதி ஒப்பந்த மீறல் கடிதத்தை கனடிய அரசு அனுப்பியுள்ளது.
Brampton நகர Assembly ஆலையை கவச வாகனத் தயாரிப்பு நிறுவனமான Roshel நிறுவனத்திற்கு விற்பனை செய்வதாக Stellantis நிறுவனம் கடந்த நாட்களில் அறிவித்தது.
இதைத் தொடர்ந்து, அந் நிறுவனத்திற்கு எதிராக கனடிய மத்திய அரசு உத்தியோகபூர்வ ஒப்பந்த மீறல் கடிதத்தை அனுப்பியுள்ளது.
கனடிய அரசின் மூலோபாயப் பதிலளிப்பு நிதியத்தின் கீழ் வழங்கப்பட்ட சுமார் $529 மில்லியன் மத்திய நிதியுதவி தொடர்பான வாக்குறுதிகளை Stellantis நிறுவனம் மீறியுள்ளதாக Mark Carney அரசாங்கம் குற்றம் சாட்டியுள்ளது.
தொழில்துறை அமைச்சர் Mélanie Joly வியாழக்கிழமை (12) அனுப்பியுள்ள அதிகாரப்பூர்வக் கடிதத்தில் மிகக் கடுமையான சட்ட எச்சரிக்கைகளை விடுத்துள்ளார்.
இந்த நிலைமைகளை சரிசெய்வோம் என்பதை நிரூபிக்க Stellantis நிறுவனத்திற்கு 30 நாட்கள் அவகாசம் வழங்கப்பட்டுள்ளது.
அவ்வாறு செய்யத் தவறினால், அந்த நிறுவனம் தனது சட்டபூர்வ கடமைகளில் இருந்து தவறிவிட்டதாக அதிகாரப்பூர்வமாக அறிவிக்கப்படும் என அமைச்சர் எச்சரித்துள்ளார்.
30 நாட்களுக்குள் உரிய தீர்வு எட்டப்படாவிட்டால், மத்திய நிதி ஒப்பந்தத்தை முழுமையாக இரத்து செய்வது உட்பட பல்வேறு கடுமையான அபராதங்களை எதிர்கொள்ள நேரிடும் எனவும் அமைச்சரின் கடிதம் குறிப்பிடுகிறது.
குறிப்பாக, இதுவரை அரசிடமிருந்து பெற்ற நிதியுதவி முழுவதையும் அல்லது அதன் ஒரு பகுதியை வட்டியுடன் திரும்பச் செலுத்த வேண்டும் என உத்தரவிடப்படும் எனவும் அமைச்சர் Mélanie Joly கடுமையாக எச்சரித்துள்ளார்.
