கனடிய தொழிலாளர்களின் வேலைவாய்ப்புகளைப் பாதுகாக்கவும், தற்காப்பு நடவடிக்கைகளை எடுக்கவும் கனடிய அரசாங்கம் தன் வசம் உள்ள அனைத்து பொருளாதார வழிமுறைகளையும் பயன்படுத்த தயாராக இருக்க வேண்டும் என வலியுறுத்தப்படுகிறது.
கனடாவின் மிகப்பெரிய தனியார் துறை தொழிற்சங்கமான UNIFOR இந்த விடயத்தில் மத்திய அரசாங்கத்திடம் அவசர கோரிக்கை ஒன்றை முன் வைத்துள்ளது.
கனடிய வேலை வாய்ப்புகளை வெளிநாடுகளுக்கு கொண்டு செல்லும் நிறுவனங்களைத் தண்டிக்க வேண்டும் என UNIFOR கோருகிறது.
கனடிய அரசு தனது ‘வெளிநாட்டு எல்லை தாண்டிய நடவடிக்கைகள் சட்டத்தை’ (Foreign Extraterritorial Measures Act – FEMA) இதற்கு பயன்படுத்த வேண்டும் என UNIFOR தொழிற்சங்க தேசியத் தலைவர் Lana Payne வலியுறுத்தினார்.
அமெரிக்க ஜனாதிபதி Donald Trump கனடாவுக்கு எதிரான வர்த்தகப் போரை தீவிரப்படுத்தியுள்ள நிலையில் இந்தக் கோரிக்கை முன்வைக்கப்படுகிறது.
அமெரிக்க ஜனாதிபதியின் புதிய பொருளாதாரத் தடைகள், வரிகள் காரணமாக கனடாவில் இருக்கும் உற்பத்திகளும் வேலை வாய்ப்புகளும் அமெரிக்காவிற்கு மாற்றப்படலாம் என்ற அச்சம் எழுந்துள்ளது.
இந்த நிலையில், கனடிய தொழிலாளர்களின் வேலை வாய்ப்புகளைப் பாதுகாக்கவும், தற்காப்பு நடவடிக்கைகளை எடுக்கவும் கனடிய மத்திய அரசு தன்னிடம் உள்ள அனைத்து பொருளாதார வழிமுறைகளையும் பயன்படுத்தத் தயாராக இருக்க வேண்டும் என UNIFOR தொழிற்சங்கம் கோருகிறது.
