மூன்று மாகாண மத்திய தொகுதிகளில் இடைத் தேர்தல் அடுத்த மாதம் நடைபெற உள்ளது.
Ontario, Quebec, British Colombia ஆகிய மாகாணங்களில் உள்ள மூன்று தொகுதிகளுக்கான இடைத் தேர்தல்களை பிரதமர் ஞாயிற்றுக்கிழமை (26) அறிவித்தார்.
இந்தக் கோடை காலத்தின் ஆரம்பத்தில் இந்த மூன்று தொகுதிகளும் வெற்றிடமாகின.
ஒரு தொகுதியின் நாடாளுமன்ற உறுப்பினர் அரசியலில் இருந்து விலக முடிவு செய்ததாலும், மற்றொருவர் ஐரோப்பிய ஒன்றியத்திற்கான தூதராக நியமிக்கப்பட்டதாலும், மூன்றாவது நபர் மேல் சபைக்கு நியமிக்கப்பட்டதாலும் இந்த இடங்கள் வெற்றிடமாகின.
நாடாளுமன்றத்தில் தங்கள் கட்டுப்பாட்டை தக்கவைத்துக் கொள்ள Liberal கட்சிக்கு ஒரு ஆசனம் தேவையான நிலையில் இந்த இடைத் தேர்தல்கள் அறிவிக்கப்பட்டுள்ளது.
தற்போதைய நிலவரப்படி, Liberal கட்சி 171 ஆசனங்களை சபாநாயகர் இல்லாமல் தம்வசம் கொண்டுள்ளனர்.
இந்த நிலையில் Ontario, Quebec, British Colombia ஆகிய மாகாணங்களில் உள்ள மூன்று தேர்தல் தொகுதிகளுக்கு August மாதத்தில் இடைத் தேர்தல்கள் நடத்தப்படும் என பிரதமர் Mark Carney அறிவித்தார்.
Beaches-East York (Ontario), Chicoutimi-Le Fjord (Quebec), North Vancouver-Capilano (British Colombia) ஆகிய தொகுதிகளின் வாக்காளர்கள் August 31 அன்று இடைத்தேர்தலில் வாக்களிக்கின்றனர்.
பிரதமர் அலுவலகம் ஞாயிறன்று இந்த இடைத்தேர்தலுக்கான அறிவித்தலை ஒரு அறிக்கையில் வெளியிட்டது.
Ontario மாகாணத்தில் உள்ள Beaches-East York தொகுதி நாடாளுமன்ற உறுப்பினர் பதவியில் இருந்து Nate Erskine-Smith பதவி விலகினார்.
முன்னாள் மத்திய அமைச்சரான இவர், Ontario Liberal கட்சியின் தலைவருக்கான போட்டியில் ஈடுபடத் திட்டமிட்டிருந்தார்.
ஆனால், மாகாண இடைத் தேர்தலுக்கான வேட்பாளர் தேர்வில் தோல்வியடைந்ததால், அவரது அரசியல் எதிர்காலத் திட்டங்கள் குறித்த தெளிவின்மை நிலவுகிறது.
2015-ல் Nate Erskine-Smith போட்டியிட்டதிலிருந்து, இந்தத் தொகுதி Liberal கட்சியின் கோட்டையாக கருதப்படுகிறது.
அன்றில் இருந்து இந்தத் தொகுதியை அக்கட்சி தக்கவைத்து வருகிறது.
ஆனால், 2011-ல் NDP வெற்றி பெற்றதில் இருந்து இந்தத் தொகுதி அந்தக் கட்சியின் வசம் இருந்தது.
Conservative கட்சி நாடாளுமன்ற உறுப்பினர் Richard Martel, மேல் சபைக்கு நியமிக்கப்பட்டதைத் தொடர்ந்து, Québec மாகாணத்தில் உள்ள Chicoutimi-Le Fjord தொகுதி நாடாளுமன்ற உறுப்பினர் பதவியில் இருந்து விலகினார்.
கடந்த இருபது ஆண்டுகளில், இந்தத் தொகுதியானது Bloc Quebecois, NDP, Liberal கட்சிகள், 2018 முதல் Conservative கட்சிகளுக்கிடையே பலமுறை கைமாறியுள்ளது.
British Colombia மாகாணத்தில் உள்ள North Vancouver-Capilano தொகுதி நாடாளுமன்ற உறுப்பினர் பதவியில் இருந்து, முன்னாள் Liberal கட்சி நாடாளுமன்ற உறுப்பினரான Jonathan Wilkinson விலகினார்.
அவர் ஐரோப்பிய ஒன்றியத்திற்கு கனடாவின் தூதராகப் பொறுப்பேற்றுள்ளார்.
Justin Trudeau தலைமையிலான Liberal கட்சி ஆட்சிக்கு வந்தபோது, Conservative கட்சி நாடாளுமன்ற உறுப்பினர் Andrew Saxton-னை Jonathan Wilkinson தோற்கடித்ததிலிருந்து, அந்தத் தொகுதியை Liberal கட்சியினர் தக்க வைத்துள்ளனர்.
இந்த மூன்று இடைத்தேர்தல் தொகுதிக்கும் ஆளும் Liberal கட்சி தனது வேட்பாளர்களை உறுதிப்படுத்தியுள்ளது.
Beaches-East York தொகுதியில் Tanveer Shahnawaz, Chicoutimi-Le Fjord தொகுதியில் Daniel Gobeil, North Vancouver-Capilano தொகுதியில் Braeden Caley ஆகியோர் Liberal கட்சி வேட்பாளர்களாக அறிவிக்கப்பட்டுள்ளனர்.
Conservative கட்சி North Vancouver-Capilano தொகுதியின் வேட்பாளராக Stephen Curran, Chicoutimi-Le Fjord தொகுதியின் வேட்பாளராக Régis Gaudreault ஆகியோரை நியமித்துள்ளது.
Conservative கட்சியின் வேட்பாளர் Beaches-East York தொகுதியில் இதுவரை நியமிக்கப்படவில்லை.
NDP இதுவரையிலும் இந்த மூன்று தொகுதிகளில் வேட்பாளர்களை நியமிக்கவில்லை.
Chicoutimi-Le Fjord தொகுதியில் நடைபெறும் இடைத் தேர்தலில் Caroline Dubé தமது வேட்பாளராக இருப்பார் என Bloc Québécois கட்சி அறிவித்துள்ளது.
North Vancouver-Capilano தொகுதியில் பசுமைக் கட்சியின் வேட்பாளராக Shelley Luce களமிறங்குகிறார்.
தற்போது Liberal கட்சி 172 இடங்களையும், Conservative கட்சி 139 இடங்களையும், Bloc Quebecois கட்சி 21 இடங்களையும் கொண்டுள்ளன.
மேலும், ஐந்து NDP நாடாளுமன்ற உறுப்பினர்களும், ஒரு பசுமைக் கட்சி நாடாளுமன்ற உறுப்பினரும் உள்ளனர்.
ஒரு சுயேச்சை உறுப்பினரும் உள்ளார்.
September மாத இறுதியில் கோடைக்கால விடுமுறை முடிந்து நாடாளுமன்ற உறுப்பினர்கள் திரும்பும் வேளையில், Liberal கட்சியினர் 170 ஆசனங்களைக் கொண்டிருப்பார்கள் என எதிர்பார்க்கப்படுகிறது.
August 28 அன்று முன்னாள் Liberal அமைச்சர் Steven Guilbeault பதவி விலக உள்ளார்.
வேறு சில தொகுதிகளில் பதவி விலகல்கள் காரணமாக, September மாத இறுதியில் எதிர்க்கட்சிகளின் மொத்த தொகுதிகளின் எண்ணிக்கை 165-ஆக இருக்கும் என எதிர்பார்க்கப்படுகிறது.
Conservative கட்சி நாடாளுமன்ற உறுப்பினர் Cathay Wagantall, August 31 அன்று தனது பதவியில் இருந்து விலகவுள்ளதாக அதிகாரப்பூர்வமாக தெரிவித்துள்ளார்.
மேலும், NDP நாடாளுமன்ற உறுப்பினர் Alexandre Boulerice மாகாண அரசியலில் களமிறங்கத் தீர்மானித்துள்ளார்.
Quebec மாகாணத் தேர்தல் அறிவிக்கப்பட்ட பின்னர் அவர் தனது பதவியில் இருந்து அதிகாரப்பூர்வமாக விலகவுள்ளதாக கூறியுள்ளார்.
இந்த நிலையில் நடைபெற உள்ள மூன்று இடைத் தேர்தல்களில் Liberal கட்சி ஒன்றில் வெற்றி பெற்றால், அவர்களின் நாடாளுமன்ற உறுப்பினர்களின் எண்ணிக்கை 171 ஆக உயரும்.
இது சபையில் ஒரு பெரும்பான்மையை அவர்கள் தக்கவைத்துக்கொள்ள அனுமதிக்கிறது.
ஆனாலும் வாக்குகள் சமநிலையில் இருக்கும் போது முடிவை தீர்மானிக்க அவர்கள் சபாநாயகரை சார்ந்திருக்க வேண்டிய நிலையை தோற்றுவிக்கும்.
இந்த நிலையில் நாடாளுமன்றத்தில் பிரதமர் இடைத் தேர்தலை அறிவிக்காத ஒரு தொகுதி வெற்றிடமாக உள்ளது.
அது முன்னாள் Bloc Québécois நாடாளுமன்ற உறுப்பினர் Simon-Pierre Savard-Tremblay பிரதிநிதித்துவப்படுத்திய Saint-Hyacinthe-Bagot-Acton தொகுதியாகும்.
Quebec மாகாணத் தேர்தலில் போட்டியிடுவதற்காக இந்த ஆண்டின் ஆரம்பத்தில் அவர் அங்கிருந்து பதவி விலகி இருந்தார்.
இந்தத் தொகுதியில் இடைத் தேர்தலை நடத்துவதற்கான மிக முந்தைய திகதி August 10 எனவும் பிந்திய திகதி December 19 எனவும் தேர்தல் திணைக்களம் தெரிவித்தது.
