Progressive Conservative கட்சியில் இருந்து விலகிய முன்னாள் அமைச்சர் தொடர்ந்து கட்சியின் மாகாண சபை உறுப்பினர் குழுவில் நீடிப்பாரா என்பது குறித்து Ontario முதல்வர் பதிலளிக்க மறுத்தார்.
$16 ஆயிரத்திற்கும் அதிகமான விடுதி செலவுகளைத் திருப்பிச் செலுத்துவதாக உறுதியளித்த பின்னர் கடந்த வாரம் பதவி விலகிய முன்னாள் அமைச்சர் Stan Cho, தனது கட்சி மாகாணசபை உறுப்பினர்கள் குழுவில் தொடர்ந்து நீடிப்பாரா என்பது குறித்து Ontario மாகாண முதல்வர் Doug Ford கருத்து தெரிவிக்கவில்லை.
திங்கட்கிழமை (20) நடைபெற்ற செய்தியாளர் சந்திப்பில் பேசிய முதல்வர், Stan Cho-வின் செயல்களை “ஏற்றுக்கொள்ள முடியாதவை” என மீண்டும் குறிப்பிட்டார்.
ஆனால் Stan Cho கட்சி குழுவில் நீடிப்பாரா இல்லையா என்பது குறித்து அவர் பதில் கூறவில்லை.
Progressive Conservative அரசாங்கத்தின் சட்டமன்ற உறுப்பினர்கள் பலர் Toronto-வில் தங்குவதற்காக விடுதிகளுக்கு பல்லாயிரக்கணக்கான டொலர்களை செலவு செய்தது அண்மையில் வெளிச்சத்திற்கு வந்தது.
Willowdale தொகுதியின் பிரதிநிதியும் அமைச்சராக பணியாற்றியவருமான Stan Cho, 2023-24 முதல் 2025-26 வரையிலான காலத்தில் Toronto நகரில் விடுதிகளுக்கு வரி செலுத்துவோரிடம் இருந்து ஆயிரக்கணக்கான டொலர்களை கட்டணமாகப் பெற்றிருந்தார் என்ற விபரமும் கடந்த வாரம் வெளியானது.
இந்த செலவினம் தொடர்பான சர்ச்சை தொடர்பாக Doug Ford திங்களன்று மன்னிப்பு கோரினார்.
அரசாங்கத்தில் அமைச்சர்களாகவோ அல்லது மாகாணசபை உதவியாளர்களாகவோ உயர் பதவிகளை வகிக்கும் Peel பிராந்தியத்தைச் சேர்ந்த மூன்று மாகாணசபை உறுப்பினர்கள், முன்னாள் அமைச்சர் Stan Cho-வை விட ஏறக்குறைய சமமான அல்லது அதிக மக்கள் பணத்தை பெற்றதும் தெரியவந்தது.
Progressive Conservative கட்சியின் நிலைக்கு முதல்வர் Doug Ford முழுப் பொறுப்பு என Ontario NDP தலைவர் Marit Stiles ஒரு அறிக்கையில் கூறினார்.
