Nova Scotia முதல்வரின் வாகனத்தை சூழ்ந்த போராட்டக்காரர்கள் அதன் கண்ணாடியை சேதப்படுத்தினர்.
Annapolis Valley வர்த்தக சபையினரிடம் Nova Scotia மாகாண முதல்வர் Tim Houston உரையாற்றினார்.
மாகாணம் முழுவதும் உள்ள வர்த்தக சபைகளில் முதல்வர் மேற்கொள்ளவிருந்த உரையாடல் சுற்றுப்பயணத்தின் ஆரம்ப நிகழ்வு, அவருக்குக் காவல்துறை பாதுகாப்பு தேவையை ஏற்படுத்தும் சூழலில் முடிந்தது.
Acadia பல்கலைக்கழகத்தில் புதன்கிழமை (15) Tim Houston, மாகாணத்தின் பொருளாதாரம் குறித்த தனது தொலைநோக்குப் பார்வை குறித்து Annapolis Valley வர்த்தக சபையிடம் உரையாற்றினார்.
அந்த நிகழ்வின் முடிவில் அங்கிருந்து இருந்து அவர் வெளியேற முயன்ற போது அவரது வாகனத்தை சூழ்ந்த போராட்டக்காரர்கள் அதன் முன்பக்கக் கண்ணாடியை உடைத்தனர்.
அவரது பாதுகாப்பு குறித்து முதல்வர் பாதுகாப்பு பிரிவைச் சேர்ந்தவர்களும் , காவல்துறையினரும் கவலை தெரிவித்த நிலை அவர் மீண்டும் பல்கலைக்கழக கட்டிடத்திற்குள் அழைத்து செல்லப்பட்டார்.
பின்னர் Tim Houston அடையாளமிடப்பட்ட RCMP வாகனத்தில் பல்கலைக்கழக வளாகத்தை விட்டு வெளியேறினார்.
இதில் எவருக்கும் எந்தவிதமான காயங்களும் ஏற்படவில்லை என RCMP தெரிவித்தது.
இந்த சம்பவம் தொடர்பாக ஒருவர் கைது செய்யப்பட்டு பின்னர் எவ்விதக் குற்றச்சாட்டும் இன்றி விடுவிக்கப்பட்டதாகவும் காவல்துறை தெரிவித்தது.
இதில் காவல்துறையினர் விசாரணை தொடர்வதாக தெரிவிக்கப்படுகிறது.
அமைதியான முறையில் போராடுவதற்கான பொதுமக்களின் உரிமையை எப்போதும் மதிக்கும் போதிலும் இந்த நிகழ்வு அமைதிக்கு முற்றிலும் முரணானதாக இருந்ததாக முதல்வர் அலுவலகம் வெளியிட்ட அறிக்கையில் குறிப்பிடப்பட்டிருந்தது.
அந்த அறிக்கையில் RCMP, சட்ட அமுலாக்க துறைக்கு Tim Houston நன்றி தெரிவித்தார்.
தான் எவரிடமும் உரையாடத் தயாராக இருப்பதாக கூறிய அவர், புதன்கிழமை நடந்தது போன்ற நிகழ்வுகள் “ஆக்கப்பூர்வமான உரையாடலை முன்னெடுத்துச் செல்ல உதவாது” என சுட்டிக்காட்டினார்.
இந்த சம்பவங்களை பிரதமர் Mark Carney சமூக ஊடகப் பதிவு ஒன்றில் கண்டித்தார்.
கனடாவில் அமைதியான முறையில் போராட்டம் நடத்துவதற்கான உரிமை உள்ளதை வலியுறுத்திய அவர், வன்முறையிலும், மிரட்டயிலும் ஈடுபடுவதற்கு எந்த நியாயமும் இல்லை என X தளத்தில் பதிவிட்டுள்ளார்.
Nova Scotia அதிகாரப்பூர்வ எதிர்க்கட்சித் தலைவரும் NDP தலைவருமான Claudia Chender, மாகாண மக்கள் தங்கள் கருத்துக்களை “பாதுகாப்பானதும் கண்ணியமானதுமான முறையில்” வெளிப்படுத்துமாறு வலியுறுத்தினார்.
முதல்வரின் வர்த்தக சபை சுற்றுப்பயணத்தின் இரண்டாவது நிகழ்வு வியாழக்கிழமை (16) நடைபெறவுள்ளது.
