தொலைவில் இருந்து கொண்டு நாடுகளுக்கு அறிவுரை கூறுவது ஒரு பயனற்ற உத்தி என கனடிய பிரதமர் தெரிவித்தார்.
சவூதி அரேபியாவில் வியாழக்கிழமை (09) செய்தியாளர்களுடனான சந்திப்பில் Mark Carney இந்தக் கருத்தை கூறினார்.
26 ஆண்டுகளில் சவுதி அரேபியாவுக்கு பயணம் மேற்கொண்ட முதல் கனடிய பிரதமர் Mark Carney ஆவார்.
இந்தப் பயணத்தில், சவுதி அரேபியாவின் பட்டத்து இளவரசரும் பிரதமருமான Mohammed bin Salman-னை அவர் சந்தித்தார்.
உலகம் முழுவதும் புதிய பொருளாதார கூட்டாண்மைகளை நாடிவரும் கனடிய பிரதமர் துருக்கியில் NATO உச்சி மாநாட்டில் பங்கேற்ற பின்னர் சவூதி அரேபியா பயணமானார்.
கனடா-சவுதி அரேபியா ஒருங்கிணைப்புக் குழுவை நிறுவுவதற்காக, இரு நாடுகளும் இணைந்து ஒரு புரிந்துணர்வு ஒப்பந்தத்தில் கையெழுத்திட்டன.
இது பாதுகாப்பு, வர்த்தகம் போன்ற துறைகளில் ஒத்துழைப்பை வலுப்படுத்துவதை நோக்கமாகக் கொண்டுள்ளது.
அங்கு செய்தியாளர்களிடம் பேசிய Mark Carney, “ஈடுபாடு என்பது அங்கீகாரம் அல்ல” என வலியுறுத்தினார்.
தொலைவில் இருந்து கொண்டு நாடுகளுக்கு அறிவுரை கூறுவது ஒரு பயனற்ற அணுகுமுறை என கூறிய அவர், அது மனநிறைவு அளிக்கக்கூடியதாக இருக்கலாம், ஆனால் பலனளிக்காது எனவும் தெரிவித்தார்.
சவுதி அரேபியா, துருக்கி போன்ற நாடுகளுடன் உறவை வலுப்படுத்துவதன் முக்கியத்துவம் குறித்தும் Mark Carney செய்தியாளர்களிடம் பேசினார்.
பொருளாதார, மூலோபாய ரீதியிலான பன்முகத்தன்மை போன்றவற்றில் மிகவும் செல்வாக்கு மிக்கவை இந்த இரண்டு நாடுகளும் என கனடிய பிரதமர் குறிப்பிட்டார்.
மனித உரிமைகள் விவகாரங்களில் கனடா ஆழ்ந்த அக்கறை கொண்டுள்ளது என Mark Carney கூறினாலும், நாடுகளின் சுயநிர்ணய உரிமை குறித்தும் தான் அக்கறை கொண்டிருப்பதாக அவர் தெரிவித்தார்.
சவுதி அரேபியா தனது மனித உரிமைச் செயற்பாடுகள் குறித்து நீண்ட காலமாக சர்வதேச அமைப்புகளின் விமர்சனங்களை எதிர்கொண்டு வருகிறது.
2018-இல் கனடா, சவுதி அரேபியா ஆகிய நாடுகளுக்கு இடையிலான உறவுகள் கடுமையாக மோசமடைந்தது.
முன்னாள் கனடிய வெளியுறவுத்துறை அமைச்சர் Chrystia Freeland பதிவிட்ட சமூக வலைதள பதிவு ஒன்றை ஆட்சேபித்த சவுதி அரேபியா, அதன் எதிரொலியாக கனடாவின் தூதரை வெளியேற்றியது.
Chrystia Freeland முன்வைத்த கருத்துக்களை தனது உள்நாட்டு விவகாரங்களில் தலையிடுவதாக கூறி சவுதி அரேபியா கண்டனம் தெரிவித்தது.
இரு நாடுகளும் 2023-ல் தமது தூதரக உறவுகளை மீண்டும் சீரமைக்க ஆரம்பித்தன.
இந்த உறவுகளை மீண்டும் கட்டியெழுப்ப மேற்கொள்ளப்பட்ட பல ஆண்டுகால முயற்சிகளின் உச்சகட்டமாக பிரதமரின் இந்தப் பயணம் நோக்கப்படுகிறது.
கனடாவும் சவூதி அரேபியாவும் ஆண்டு தோறும் சுமார் $4 பில்லியன் மதிப்பிலான இருதரப்பு வர்த்தகத்தை மேற்கொள்கின்றன என்பது குறிப்பிடத்தக்கது.
