கனடிய பிரதமர் Mark Carney செவ்வாய்க்கிழமை (22) New York சென்றடைந்தார்.
ஐ.நா. பொதுச்சபை கூட்டத்தில் பங்கேற்கும் அவர், அங்கு உலகத் தலைவர்கள், கொள்கை வகுப்பாளர்களுடன் தொடர் உயர்மட்ட பேச்சுவார்த்தைகளை நடத்த உள்ளார்.
New York நகரில் 81-வது ஐ.நா. பொதுச் சபை கூட்டத்தொடர் (UNGA) நடைபெற்று வருகிறது.
இந்தச் சூழலில், கனடாவை ஐரோப்பிய நாடுகளுடன் நெருக்கமாகவும், உலக நாடுகளுடன் உறவை வலுப்படுத்தவும் பிரதமர் Mark Carney அங்கு பயணம் மேற்கொண்டுள்ளார்.
சர்வதேச ஒழுங்குமுறை மாற்றியமைக்கப்படும் இந்தத் தருணத்தில், அதை வடிவமைக்க கனடா விரும்புகிறது என தனது பயணம் குறித்து பிரதமர் Mark Carney விடுத்துள்ள அறிக்கையில் தெரிவிக்கப்படுகிறது.
ஐ.நா. பொதுச் சபை கூட்ட காலத்தில், ஐ.நா. சபையின் சீர்திருத்தங்கள், அடுத்த பொதுச் செயலாளரைத் தேர்ந்தெடுப்பது ஆகியவற்றில் Mark Carney கவனம் செலுத்த உள்ளார்.
பிரதமரின் அதிகாரப்பூர்வ நிகழ்ச்சி நிரலின்படி, செவ்வாய் மதியம் Chile, Angola ஆகிய நாடுகளின் தலைவர்களை அவர் நேரில் சந்தித்துப் பேசுகிறார்.
இதனைத் தொடர்ந்து, மாலை வேளையில் ஐக்கிய அரபு அமீரகத்தின் (UAE) தொழில்நுட்ப அமைச்சர், Jordan நாட்டு மன்னர் ஆகியோரையும் சந்தித்து இருதரப்பு உறவுகள் குறித்து Mark Carney ஆலோசனை நடத்துகிறார்.
இந்தச் சந்திப்புகளுக்கு பின்னர் அவர் ஊடகவியலாளர்களை சந்திக்கவுள்ளார்.
இஸ்ரேல் – பாலஸ்தீன விவகாரத்தில் கனடா ஆதரிக்கும் ‘இரு நாடு தீர்வு’ (Two-State Solution) கொள்கை தொடர்பான நிகழ்வு ஒன்றிலும் பிரதமர் செவ்வாயன்று உரையாற்றுகிறார்.
ஐ.நா. பொதுச்சபை கூட்டத்தில் அமெரிக்க ஜனாதிபதியும் பங்கேற்கும் நிலையில், பிரதமர் Mark Carney அவரை சந்திக்க திட்டம் எதுவும் இல்லை என தெரியவருகிறது.
பிரதமரின் பொது சந்திப்பு பட்டியலில் Donald Trump-பின் பெயர் இடம் பெறவில்லை என்பது குறிப்பிடத்தக்கது.
இந்த மாநாட்டில் இரு தலைவர்களும் உத்தியோகப்பற்றற்ற முறையில் சந்திப்பார்களா என்பது இன்னும் உறுதி செய்யப்படவில்லை என மூத்த கனடிய அரச அதிகாரிகள் தெரிவித்துள்ளனர்.
