முதல் முத்தரப்பு CUSMA மாறு ஆய்வுக் கூட்டம் July 1-ஆம் திகதி நடைபெற உள்ளது.
கனடா-அமெரிக்கா-Mexico (CUSMA) ஒப்பந்தத்தை மறு ஆய்வு செய்வதற்கான முதல் முத்தரப்பு கூட்டத்தில், கனடிய அதிகாரிகள் July 1 அன்று தங்களது சகாக்களை சந்திப்பார்கள் என எதிர்பார்க்கப்படுகிறது.
கனடா-அமெரிக்க வர்த்தக அமைச்சின் செய்தித் தொடர்பாளர் இதனை உறுதிப்படுத்தினார்.
கனடா-அமெரிக்கா-Mexico ஒப்பந்தத்தில் பரிந்துரைக்கப்பட்டுள்ள படி July 1 அன்று தனது அமெரிக்க, Mexico சகாக்களை சந்திக்க கனடா-அமெரிக்க வர்த்தக அமைச்சர் Dominic LeBlanc ஆவலுடன் இருப்பதாக அவரது செய்தித் தொடர்பாளர் தெரிவித்தார்.
அண்மைய வாரங்களில் அவர் இரு நாடுகளுடனும் நடத்திய நேர்மறையான, ஆக்கப்பூர்வமான இருதரப்புப் பேச்சுவார்த்தைகளை மேலும் வலுப்படுத்துவதற்கான ஒரு வாய்ப்பாக இது அமையும் எனவும் அவர் மேலும் கூறினார்.
தற்போதைக்கு இந்தக் கூட்டம் இணையவழியில் நடைபெற திட்டமிடப்பட்டுள்ளது எனவும், ஆனால் சூழ்நிலைகள் மாறக்கூடும் எனவும் அமைச்சர் அலுவலகம் தெரிவித்துள்ளது.
கடந்த வாரம் France-சில் நடைபெற்ற G7 உச்சி மாநாட்டின் இடையே, அமைச்சர் Dominic LeBlanc, தலைமை வர்த்தகப் பேச்சுவார்த்தையாளர் Janice Charette ஆகியோர் அமெரிக்க வர்த்தக பிரதிநிதி Jamieson Greer-ரைச் சந்தித்தனர்.
அமெரிக்கா – Mexico ஆகிய நாடுகள் ஏற்கனவே முறைப்படியான இருதரப்புப் பேச்சுவார்த்தைகளை ஆரம்பித்துள்ளன.
ஆனால் கனடாவும் அமெரிக்காவும் இதுவரை பேச்சுவார்த்தைகளை ஆரம்பிக்கவில்லை.
வர்த்தக ஒப்பந்தத்தில் ஈடுபட்டுள்ள மூன்று தரப்பினரும், இந்த ஒப்பந்தத்தை மேலும் 16 ஆண்டுகளுக்குப் புதுப்பிப்பதா, ஒப்பந்தத்திலிருந்து முழுமையாக விலகுவதா, அல்லது பல ஆண்டுகள் நீடிக்கக்கூடிய வருடாந்த தொடர் மறு ஆய்வு செயல்முறையை ஆரம்பிப்பதா என்பதை முடிவு செய்வதற்கு July 1 இறுதித் திகதியாகும்.
தற்போதைய ஒப்பந்தத்தை மேலும் 16 ஆண்டுகளுக்கு நீட்டிக்க விரும்புவதாக கனடா, Mexico ஆகிய நாடுகள் தெரிவித்துள்ளன.
ஆனாலும் அமெரிக்கா இந்த விடயத்தில் தனது நோக்கத்தை அதிகாரப்பூர்வமாக அறிவிக்கவில்லை.
தற்போதைய ஒப்பந்தத்தை நீட்டிக்க விரும்பவில்லை என அமெரிக்க ஜனாதிபதி Donald Trump சமிக்ஞை வெளியிட்டு வருவது குறிப்பிடத்தக்கது.
