Toronto நகர முதல்வர் தேர்தலில் போட்டியிட போவதில்லை என John Tory அறிவித்தார்.
பல மாதங்களாக நிலவி வந்த ஊகங்களுக்கு முற்றுப்புள்ளி வைத்து, நகர முதல்வர் பதவிக்கு போட்டியிட போவதில்லை என John Tory செவ்வாய்கிழமை (03) அறிவித்தார்.
Toronto நகர முதல்வராக பணியாற்ற கிடைத்தது “வாழ்நாளின் மிகப்பெரிய மரியாதை” என கூறிய John Tory, தனது குடும்பத்தை விமர்சனங்களுக்கு உட்படுத்த முடியாது எனவும் தெரிவித்தார்.
மூன்றாவது முறையாக நகர முதல்வராக வெற்றி பெற்ற சில மாதங்களுக்குப் பின்னர், 71 வயதான John Tory, February 2023-இல் தனது பதவியில் இருந்து விலகினார்.
ஒரு ஊழியருடன் தகாத உறவில் இருந்ததை ஒப்புக்கொண்ட பின்னர், நகர முதல்வர் பதவியில் இருந்து விலகும் முடிவை அவர் எடுத்திருந்தார்.
Toronto நகரசபைத் தேர்தல் இந்த வருடம் நடைபெறவுள்ள நிலையில், நகர முதல்வர் பதவிக்கு ஒரு சாத்தியமான போட்டியாளராக John Tory கருதப்பட்டார்.
இந்தத் தேர்தலில் John Tory, தற்போதைய நகர முதல்வர் Olivia Chow ஆகியோர் போட்டியிட்டால் கடுமையான போட்டி நிலவும் என அண்மைய கருத்துக் கணிப்பொன்று தெரிவித்திருந்தது.
இந்த நிலையில் மீண்டும் தேர்தலில் போட்டியிடுவாரா என்பதை Olivia Chow இதுவரை அறிவிக்கவில்லை.
2023 நகர முதல்வர் இடைத் தேர்தலில் தோல்வியடைந்த நகர சபை உறுப்பினர் Brad Bradford மீண்டும் நகர முதல்வர் பதவிக்கு போட்டியிட போவதாக அறிவித்துள்ளார்.
நகரசபைத் தேர்தல் October 26-ஆம் திகதி நடைபெற உள்ளது குறிப்பிடத்தக்கது.
