அமெரிக்காவுக்கு அடுத்த வாரம் ஒரு பயணம் மேற்கொள்வது குறித்து கனடிய பிரதமர் பரிசீலித்து வருவதாக மத்திய அரசாங்க வட்டாரத் தகவல்கள் உறுதிப்படுத்தின.
அமெரிக்க ஜனாதிபதியுடன் வர்த்தகப் பேச்சுவார்த்தைகளை மீண்டும் ஆரம்பிக்க அவசரமில்லை என கனடிய பிரதமர் தெரிவித்த 48 மணி நேரத்திற்குள் இந்தத் தகவல் வெளியானது.
தென்னாப்பிரிக்காவில் வார விடுமுறையில் நடந்த G20 தலைவர்கள் உச்சி மாநாட்டில் Mark Carney கலந்து கொண்டார்.
அங்கு செய்தியாளர்களிடம் பேசிய போது பொருத்தமான போது மீண்டும் அமெரிக்க ஜனாதிபதியுடன் பேசுவேன் என அவர் கூறினார்.
இந்த நிலையில் அடுத்த வாரம் Washington-னுக்கு ஒரு பயணம் மேற்கொள்வது குறித்து Mark Carney பரிசீலித்து வருவதாக கனடிய மத்திய அரசாங்க தகவல் உறுதிப்படுத்தியுள்ளது.
அமெரிக்கா மீண்டும் வர்த்தக உரையாடல்களை நடத்த விரும்பினால், நாங்கள் அந்த விவாதங்களை நடத்துவோம் எனவும் பிரதமர் Mark Carney விடுமுறையில் தெரிவித்திருந்தார்.
அடுத்த வாரம் Mark Carney அமெரிக்க தலைநகருக்கு பயணம் மேற்கொண்டால், April மாதம் அவர் தேர்தலில் தேர்ந்தெடுக்கப்பட்டதிலிருந்து இது அவரது மூன்றாவது பயணமாக இருக்கும்.
Ontario மாகாண அரசாங்கத்தினால் வெளியிடப்பட்ட கட்டண எதிர்ப்பு விளம்பரம் காரணமாக அமெரிக்க ஜனாதிபதி Donald Trump கடந்த மாதம் கனடாவுடன் பேச்சுவார்த்தைகளை இடை நிறுத்தினார்.
கனடாவுடனான வர்த்தகப் பேச்சுவார்த்தைகளை முடித்துக் கொள்வதாக திடீரென அறிவித்த Donald Trump, கனடாவுக்கு எதிராக மேலதிகமாக 10 சதவீத வரியை அறிவித்தார் என்பது குறிப்பிடத்தக்கது.
LJI Reporter ரம்யா சேது
