Mark Carney அரசாங்கத்தின் வரவு செலவுத் திட்டத்திற்கு ஆதரவு வழங்குவதற்கான எதிர்க்கட்சிகளின் நிபந்தனைகள் குறித்த விபரங்கள் வெளியாக ஆரம்பிக்கின்றன.
November மாதம் 4-ஆம் திகதி Mark Carney அரசாங்கத்தின் வரவு செலவுத் திட்டம் சமர்ப்பிக்கப்படவுள்ளது.
இந்த வரவு செலவுத் திட்டத்தின் மீதான வாக்கெடுப்பில் அரசாங்கம் தோல்வி அடைந்தால், அது ஒரு பொதுத் தேர்தலை தூண்டக்கூடிய சாத்தியக்கூறு உள்ளது.
ஆனால் விரைவில் தேர்தல் நடைபெறுவது பிரதமரின் தெரிவாக இருக்கும் என எதிர்க்கட்சித் தலைவர்கள் தெரிவித்துள்ளனர்.
Mark Carney அரசாங்கம் தமது வரவு செலவுத் திட்டத்தை நிறைவேற்ற மூன்று வாக்குகள் குறைவான நிலை உள்ளது.
இதனால் வரவு செலவுத் திட்டத்தை நிறைவேற்ற சிறுபான்மை Liberal அரசுக்கு ஏனைய கட்சி உறுப்பினர்களின் ஆதரவு தேவையான நிலை தோன்றியுள்ளது.
இந்த நிலையில் வரவு செலவுத் திட்டம் குறித்து பிரதமர் எதிர்க்கட்சிகளின் தலைவர்களை சந்தித்து உரையாடுகின்றார்.
நாடாளுமன்றக் கூட்டத்தொடர் நடைபெற்று வரும் நிலையில் Mark Carney எதிர்க்கட்சித் தலைவர்களை சந்தித்து வருவதாக பிரதமர் அலுவலகம் உறுதிப்படுத்தியது.
வரவு செலவுத் திட்டம் உட்பட்ட விடயங்களில் எதிர்க்கட்சிகளின் முன்னுரிமைகள் குறித்துப் பேசுவதற்கு இந்த சந்திப்புகளை பிரதமர் முன்னெடுக்கின்றார்.
Conservative, Bloc Québécois, NDP, பசுமைக் கட்சி தலைவர்களுடன் சந்திப்புகள் ஏற்கனவே நடந்துள்ளதாக பிரதமர் அலுவலகம் தெரிவித்துள்ளது.
வரவு செலவுத் திட்டம் குறித்து விவாதிக்க, Conservative தலைவர் Pierre Poilievre புதன்கிழமை (22) பிரதமரை தனிப்பட்ட முறையில் சந்தித்தார்.
இந்த சந்திப்பு ஒரு திறந்த உரையாடலாக அமைந்தது என செய்தியாளர்களிடம் பேசிய Pierre Poilievre தெரிவித்தார்.
ஆனாலும் சந்திப்பில் உரையாடப்பட்ட விடயங்கள் குறித்து தெரிவிக்க அவர் மறுத்து விட்டார்.
வரவு செலவுத் திட்டத்தில் உள்ளடக்கப்பட்டுள்ள விடயங்கள் குறித்து தெரியாமல் அதை ஆதரிப்பதா அல்லது எதிப்பதா என்பது குறித்து கருத்து தெரிவிக்கவும் அவர் மறுத்து விட்டார்.
முன்னதாக திங்கட்கிழமை (20) பிரதமருக்கு Pierre Poilievre ஒரு திறந்த கடிதத்தை அனுப்பி இருந்தார்.
அதில் மத்திய வரவு செலவுத் திட்டத்தின் பற்றாக்குறையை $42 பில்லியனாக வைத்திருக்க வேண்டும் என்ற கோரிக்கை உட்பட பல கோரிக்கைகளை அவர் குறிப்பிட்டிருந்தார்.
Bloc Quebecois தலைவர் Yves-François Blanchet புதனன்று பிரதமரை சந்தித்து இந்த வரவு செலவுத் திட்டத்தில் இணைக்கப்பட வேண்டிய தமது கோரிக்கைகளை முன்வைத்துள்ளார்.
இது ஒரு சுமூகமான சந்திப்பு என் கூறிய Yves-François Blanchet , அவரது கட்சியின் கோரிக்கைகளை நிபந்தனைகள் என வகைப்படுத்தியதுடன், தேர்தலுக்கு முன்னரே இந்த நிபந்தனைகள் தெளிவானவை எனவும் கூறினார்.
பெரும்பான்மை வாக்குகளை பெற கூடிய வகையில் வரவு செலவுத் திட்டத்தை உருவாக்குவது அரசாங்கத்தின் கடமைகளில் ஒன்று என NDP இடைக்கால தலைவர் Don Davies கூறினார்.
இந்த வரவு செலவுத் திட்டத்தை நிறைவேற்ற எதிர்க்கட்சிகளுடன் சந்தித்து அவர்களின் ஆதரவை பெற அவர்களுடன் இணைந்து பணியாற்ற வேண்டிய பொறுப்பு அரசாங்கத்தின் மீது உள்ளது என செவ்வாய்க்கிழமை (21) வெளியிட்ட ஒரு அறிக்கையில் அவர் குறிப்பிட்டார்.
கனடியர்கள் மீண்டும் உடனடியாக ஒரு தேர்தலை விரும்புவார்கள் என தான் நம்பவில்லை எனவும், புதிய ஜனநாயகக் கட்சி “நாடாளுமன்றத்தை கனடியர்களுக்காக சேவை செய்ய வைக்க” தயாராக இருப்பதாகவும் Don Davies கூறினார்.
