Stellantis Brampton ஆலை விற்பனைக்கு எதிராக சட்டத்தின் முழு வலிமையையும் பயன்படுத்தி தொழிலாளர்களைக் காப்போம் என கனடிய பிரதமர் Mark Carney அறிவித்தார்.
Montreal நகரில் செவ்வாய்க்கிழமை (10) நடைபெற்ற செய்தியாளர் சந்திப்பில் இந்தக் கண்டனத்தை அவர் முன்வைத்தார்.
Brampton Assembly ஆலையை பாதுகாப்புத் துறை வாகனங்களை தயாரிக்கும் Roshel நிறுவனத்திற்கு தன்னிச்சையாக விற்பனை செய்துள்ள Stellantis பெருநிறுவனத்தின் முடிவை Mark Carney கண்டித்தார்.
இந்த நகர்வை ஒரு துரோகம் என அவர் சாடியுள்ளார்.
Stellantis – Roshel நிறுவனங்களுக்கு இடையிலான இந்த ஒப்பந்தம் அறிவிக்கப்பட்ட மறுதினம் பிரதமரின் கண்டனம் வெளியானது.
இந்த விற்பனை முற்றிலும் ஏற்றுக்கொள்ள முடியாது எனவும், Stellantis நிறுவனத்துடனான ஒப்பந்தங்களின் கீழ் கனடிய அரசு தனது சட்டபூர்வமான உரிமைகளையும் தொழிலாளர்களின் நலன்களையும் முழுமையாக நிலைநிறுத்தி அமுல்படுத்தும் எனவும் Mark Carney உத்தியோகபூர்வமாக பிரகடனப்படுத்தியுள்ளார்.
இந்தத் திடீர் விற்பனையால் 2023 முதல் பணி நீக்கம் பெற்ற தொழிலாளர்களின் எதிர்காலம் கேள்விக்குறியாகியுள்ள நிலையில் தொழிற்சங்கம் தனது எதிர்ப்பை தீவிரப்படுத்தியுள்ளது.
இந்த ஆலை விற்பனை குறித்து மத்திய அரசிடமிருந்து எங்களுக்குத் தெளிவான பதில்கள் வேண்டும் Unifor தேசியத் தலைவர் தெரிவித்துள்ளார்.
இந்த நிலையில் Unifor தொழிற்சங்கத் தொழிலாளர்களுக்கு Stellantis நிறுவனம் ஏற்கனவே வழங்கியிருந்த வேலைவாய்ப்பு மற்றும் ஊதிய உடன்படிக்கைகளை தங்களால் ஏற்றுக் கொண்டு தொடர இயலாது என Roshel தலைமை நிர்வாக அதிகாரி தனது நிலைப்பாட்டை வெளிப்படையாக கூறியுள்ளார் என்பது இங்கு குறிப்பிடத்தக்கது.
