கனடாவுக்கு எதிரான அமெரிக்காவின் அதிரடி வரிகளுக்கு எதிராக அமெரிக்க நீதிமன்றத்தில் வழக்கு தாக்கல் செய்யப்பட்டுள்ளது.
கனடா – அமெரிக்கா இடையே நிலவி வரும் கடுமையான வர்த்தகப் போரில் ஒரு முக்கியத் திருப்பமாக இந்த வழக்கு அமைகிறது.
கனடியப் பொருட்களுக்கு எதிராக அமெரிக்க ஜனாதிபதி Donald Trump விதித்துள்ள அதிரடி வரிகளை எதிர்த்து அமெரிக்க சர்வதேச வர்த்தக நீதிமன்றத்தில் புதிய சட்டப்பூர்வ வழக்கு ஒன்று தொடரப்பட்டுள்ளது.
இது அமெரிக்க ஜனாதிபதிக்கு புதிய நெருக்கடியாக அமைகிறது.
அமெரிக்காவைச் சேர்ந்த Liberty Justice Center என்ற இலாப நோக்கற்ற சட்ட அமைப்பு, நாட்டின் மிகப்பெரிய உணவு இறக்குமதி நிறுவனமான Gellert Global Group சார்பாக இந்த வழக்கை செவ்வாய்க்கிழமை (20) தாக்கல் செய்துள்ளது.
Donald Trump தனக்கு வழங்கப்பட்ட அதிகார வரம்புகளைத் தாண்டி இந்த வரிகளை விதித்துள்ளதாக தற்போது தாக்கல் செய்யப்பட்டுள்ள இந்த வழக்கில் குற்றம் சாட்டப்பட்டுள்ளது.
இந்த வர்த்தக வரிகள், தடைகள் அனைத்தும் சட்டவிரோதமானவை என நீதிமன்றம் அறிவிக்க வேண்டும் என Liberty Justice Center தலைமை நிர்வாக அதிகாரி தெரிவித்தார்.
தவிரவும் இந்த வரிகளால் அமெரிக்க நிறுவனங்களிடம் இருந்து வசூலிக்கப்பட்ட தொகையை உடனடியாக திரும்ப வழங்க உத்தரவிட வேண்டும் எனவும் இந்த வழக்கில் கோரப்பட்டுள்ளது.
அடுத்த மாதம் அமெரிக்காவில் இடைக்காலத் தேர்தல்கள் நடைபெற உள்ள நிலையில், இந்த வரிகள் குறித்து அமெரிக்கர்கள் மத்தியில் கடும் எதிர்ப்பு எழுந்துள்ளது இங்கு குறிப்பிடத்தக்கது.
