அமெரிக்க ஜனாதிபதியின் கனடாவுக்கு எதிரான நிலைப்பாடு குறித்து அமெரிக்காவிற்குள்ளேயே எதிர்ப்பு உள்ளது என கனடிய நாடாளுமன்ற உறுப்பினர்களுக்கு தகவல் வெளியிடப்பட்டது.
இந்த விடயத்தில் அமெரிக்க அதிகாரிகள் இரகசியமாகக் கவலை வெளியிட்டுள்ளதாக பரபரப்புத் தகவல் வெளியானது.
Donald Trump கனடா மீதும் அதன் தலைவர்கள் மீதும் பொதுவெளியில் தொடுத்து வரும் தொடர்ச்சியான வர்த்தக, இராஜதந்திரத் தாக்குதல்கள் குறித்தும், அமெரிக்காவின் உயர்மட்ட அரசியல் தலைவர்கள், வணிகப் பிரமுகர்கள் இரகசியமாகக் கடுமையான அதிருப்தியையும் கவலையையும் வெளியிட்டுள்ளனர்.
கனடிய நாடாளுமன்றத்தில் நடைபெற்ற வெளிவிவகாரக் குழு கூட்டத்தின் போது, கனடா வெளியுறவுத் துறையின் மூத்த அதிகாரிகள் இந்த உண்மைகளை திங்கட்கிழமை (05) பகிரங்கமாக வெளியிட்டனர்.
அமெரிக்கா விதித்துள்ள புதிய இறக்குமதித் தடைகளுக்கு மத்தியிலும், கனடா பக்கமுள்ள நியாயங்களை அமெரிக்க அரசியல்வாதிகளிடம் எடுத்துரைக்கக் கனடிய தூதர்கள் அமெரிக்கா முழுவதும் தீவிரமாக பணியாற்றி வருகின்றனர் என கனடிய வெளியுறவுத் துறையின் வட அமெரிக்கப் பிரிவிற்கான இயக்குநர் Niall Cronin தெரிவித்தார்.
நாடாளுமன்றக் குழுவில் திங்களன்று சாட்சியமளித்து பேசியபோது அவர் இந்தத் தகவலை வெளியிட்டார்.
Donald Trump நிர்வாகம் கனடா மீது எடுத்து வரும் சில நடவடிக்கைகள் குறித்து பல அமெரிக்க அதிகாரிகள் தங்களது தனிப்பட்ட கவலைகளை இரகசியமாகப் பகிர்ந்து வருவதாக Niall Cronin தெரிவித்தார்.
ஆனால் Donald Trump-பின் கோபத்திற்கு ஆளாக நேரிடும் என்ற பயத்தால், அவர்களில் மிகச் சிலரே இக்கருத்துக்களை பொதுவெளியில் பேச துணிகிறார்கள் எனவும் அது அவர்களது தனிப்பட்ட முடிவு என Niall Cronin நாடாளுமன்றத்தில் வெளிப்படையாகக் குறிப்பிட்டுள்ளார்.
அமெரிக்காவின் விடயத்தில் கனடா மிகவும் மோசமாக நடந்து கொள்கிறது என Donald Trump தொடர்ச்சியாக குற்றம்சாட்டிவரும் நிலையில் இந்த புதிய தகவல் வெளியானது.
