ஓராண்டுக்கு முன்னர் இருந்ததை விட கனடாவிற்கு குடியேறுபவர்களின் எண்ணிக்கை குறைந்துள்ளது.
கனடிய புள்ளிவிபரத் திணைக்களத்தின் புதிய தரவுகள் இந்தத் தகவலை சுட்டிக்காட்டுகின்றன.
நிரந்தரமற்ற குடியிருப்பாளர்களின் எண்ணிக்கை குறைந்ததால், இந்த ஆண்டின் முதல் காலாண்டில் கனடிய மக்கள் தொகை 0.1 சதவீதம் சரிந்துள்ளதாக புள்ளி விபரத் திணைக்களம் மதிப்பிடுகிறது.
January 1-ஆம் திகதியுடன் ஒப்பிடுகையில் 55,025 பேர் குறைந்து, April 1-ஆம் திகதி நிலவரப்படி கனடிய மக்கள் தொகை 41,417,056 ஆக இருந்ததாக புள்ளி விபரத் திணைக்களம் மதிப்பிட்டுள்ளது.
ஓராண்டுக்கு முன்னர் 55,194 ஆக இருந்த சரிவுடன் ஒப்பிடுகையில், இந்த ஆண்டின் முதல் மூன்று மாதங்களில் நிரந்தரமற்ற குடியிருப்பாளர்களின் முதற்கட்ட எண்ணிக்கை 117,879 பேர் குறைந்ததால் இந்த வீழ்ச்சி ஏற்பட்டுள்ளது.
கடந்த ஆண்டின் முதல் காலாண்டில் 104,210 நிரந்தரக் குடியேறிகள் வரவேற்கப்பட்ட நிலையில், இந்த ஆண்டின் முதல் காலாண்டில் 83,149 பேர் மட்டுமே வரவேற்கப்பட்டுள்ளதாக புள்ளி விபரத் திணைக்களம் தெரிவித்துள்ளது.
ஓராண்டுக்கு முன்னர் 19,961 ஆக இருந்த நிகர வெளிநாட்டுக் குடிபெயர்வு (நாட்டை விட்டு வெளியேறியவர்கள்), இந்தக் காலாண்டில் 20,140 ஆக உயர்ந்துள்ளது.
குடியேற்றம் இல்லாமல் கனடாவின் மக்கள் தொகை அளவை நிலை நிறுத்த தேவையான அளவைவிட கனடாவின் கருவுறுதல் விகிதம் குறைந்துள்ளது.
பிறப்புகளை விட இறப்புகள் அதிகமாக இருந்ததால், பிறப்புகளிலிருந்து இறப்புகளை கழித்து அளவிடப்படும் இயற்கை அதிகரிப்பு, அந்தக் காலாண்டில் -155 ஆக இருந்தது.
2025-ஆம் ஆண்டின் முதல் காலாண்டில் ஏற்பட்ட 983 அதிகரிப்புடன் இது ஒப்பிடப்படுகிறது.
