G7 உச்சி மாநாட்டில் கனடிய பிரதமரும் அமெரிக்க ஜனாதிபதியும் சீன மின்சார வாகனங்கள் குறித்துப் பேசியது வெளிச்சத்திற்கு வந்துள்ளது.
செவ்வாய்க்கிழமை (16) நடைபெற்ற தங்களின் வருடாந்த உச்சிமாநாட்டின் மதிய உணவுக்கு முன்னதாக, G7 தலைவர்கள் அமர்ந்திருந்தபோது, பிரதமர் Mark Carney, அமெரிக்க ஜனாதிபதி Donald Trump ஆகியோர் வர்த்தகம் குறித்து உரையாடுவது பதிவு செய்யப்பட்டது.
அங்கு நாற்காலியில் அமர்ந்திருக்கும் ஜனாதிபதியிடம், குறிப்பிட்ட எண்ணிக்கையிலான சீன மின்சார வாகனங்களை கனடாவுக்குள் அனுமதிப்பது தொடர்பாக கனடா சீனாவுடன் செய்து கொண்ட ஒப்பந்தம் குறித்து Mark Carney பேசுவது காணப்படுகிறது.
அந்த உரையாடலின் ஒரு பகுதியை ஒலிவாங்கிகள் பதிவு செய்துள்ளது.
அதில், ஆண்டுக்கு 49,000 சீனத் தயாரிப்பு வாகனங்களை கனடாவிற்குள் அனுமதிக்க கனடா விதித்துள்ள வரம்பு குறித்து இரு தலைவர்களும் பேசுவது பதிவாகியுள்ளது.
இது கனடிய சந்தையில் மூன்று சதவீதத்திற்கும் குறைவானது என Mark Carney அமெரிக்க ஜனாதிபதியிடம் கூறுவது ஒலி வாங்கியில் பதிவாகியுள்ளது.
இதற்கு அமெரிக்க ஜனாதிபதி தலையத்து மகிழ்ச்சி தெரிவிப்பதும் பதிவு செய்யப்பட்டுள்ளது.
கடந்த January மாதம் சீனாவுக்கு பயணம் மேற்கொண்டிருந்தபோது, சீன மின்சார வாகனங்கள் மீதான கனடாவின் வரி விகிதத்தை 100 சதவீதத்திலிருந்து 6.1 சதவீதமாக குறைக்கும் ஒரு ஒப்பந்தத்தை Mark Carney அறிவித்தார்.
இது சீன மின்சார வாகனங்களில் ஒரு குறிப்பிட்ட எண்ணிக்கையை கனடிய சந்தையில் அனுமதிக்க வழிவகுக்கிறது.
இதற்குப் பதிலாக, சீனா முக்கிய விவசாய, கடல் உணவு ஏற்றுமதிகள் மீதான வரிகளை குறைக்க ஒப்புக் கொண்டுள்ளது.
சீனாவுடனான கனடாவின் ஒப்பந்தத்தின் விவரங்கள், அது கனடிய தொழில் துறைக்கு வழங்கிய நிவாரணம் குறித்து ஜனாதிபதிக்கு நினைவூட்டுவதற்கு பிரதமருக்கு இது ஒரு வாய்ப்பு என இந்த விடயம் குறித்து கனடா-அமெரிக்க வர்த்தக அமைச்சர் Dominic LeBlanc குறிப்பிட்டார்.
Mark Carney – Donald Trump உரையாடலின் “பல விடயங்களில் இதுவும் ஒன்று” என Dominic LeBlanc கூறினார்.
“பல மாதங்களாக நன்கு அறியப்பட்ட ஒரு சூழ்நிலையைப் பற்றி விவாதிக்க பிரதமர் இந்த வாய்ப்பைப் பயன்படுத்திக் கொண்டது யாருக்கும் ஆச்சரியமளிக்க கூடாது,” எனவும் அமைச்சர் Dominic LeBlanc தெளிவு படுத்தினார்.
இரு நாட்டுத் தலைவர்கள் பேசிய ஏனைய விடயங்கள் குறித்து தெரிவிக்க மறுத்த அவர், புதன்கிழமை (17) காலை நடைபெற உள்ள செய்தியாளர் சந்திப்பில் இந்த விடயங்கள் வெளியாகலாம் என சுட்டிக்காட்டினார்.
