தமிழர் பார்த்தி கந்தவேள் பிரதிநிதித்துப்படுத்தும் தொகுதியில் நகரசபை தேர்தலில் பிரதான போட்டியாளர் ஒருவர் களமிறங்குகிறார்.
Toronto நகரசபை உறுப்பினர் பார்த்தி கந்தவேள் Ontario மாகாண காவல்துறை விசாரணையை எதிர்கொள்ளும் நிலையில், அவரது தொகுதியில் நகரசபை தேர்தலில் பிரதான போட்டியாளர் ஒருவர் களமிறங்கியுள்ளார்.
நடைபெறவுள்ள நகரசபைத் தேர்தலில் Scarborough Southwest தொகுதியில் போட்டியிட Kevin Rupasinghe புதன்கிழமை (16) வேட்புமனு தாக்கல் செய்தார்.
பொறியாளரான இவர் October மாத தேர்தலில் போட்டியிட தனது பெயரை அதிகாரப்பூர்வமாக பதிவு செய்துள்ளார்.
Scarborough Southwest (தொகுதி 20) நகரசபை உறுப்பினரான பார்த்தி கந்தவேள் 2023 இடைத் தேர்தலில் வெற்றி பெற்றார்.
Kevin Rupasinghe 2023 இடைத் தேர்தலில் இந்தத் தொகுதியில் 800 வாக்குகள் வித்தியாசத்தில் பார்த்தி கந்தவேளிடம் தோல்வியடைந்த வேட்பாளராவார்.
இந்த இடைத் தேர்தலில் இருவரும் போட்டியிட்டபோது, பார்த்தி கந்தவேள் 4,641 வாக்குகள் பெற்று, (மொத்த வாக்குப் பதிவில் 27 சதவீதத்துடன்) வெற்றி பெற்றார்.
Kevin Rupasinghe 3,854 வாக்குகளுடன், (23 சதவீதத்திற்கும் சற்றுக் குறைவான வாக்குகளுடன்) மிக நெருக்கமாக இரண்டாம் இடத்தைப் பிடித்தார்.
ஏனைய இருபத்தியொரு வேட்பாளர்கள், தொகுதியின் மீதமுள்ள 50 சதவீத வாக்குகளைப் பிரித்துக் கொண்டனர்.
இவர்கள் இருவரும் 2022 நகர சபைத் தேர்தலிலும் போட்டியிட்டனர்.
இதில் முன்னாள் நகரசபை உறுப்பினர் Gary Crawford 35 சதவிகித வாக்குகளுடன் வெற்றி பெற்றார்.
இந்தத் தேர்தலில் பார்த்தி கந்தவேள் 30 சதவீதத்திற்கும் சற்றுக் குறைவான வாக்குகளுடன் மிக நெருக்கமாக இரண்டாம் இடத்தைப் பிடித்தார்.
அதே சமயம், Kevin Rupasinghe 14 சதவீதத்திற்கும் சற்றுக் குறைவான வாக்குகளுடன் மூன்றாவது இடத்தைப் பிடித்தார்.
இம்முறை Kevin Rupasinghe தேர்தல் களத்தில் இறங்குவது, தனது தொகுதியில் உள்ள அபிவிருத்தித் திட்டங்கள் தொடர்பாக OPP விசாரணையை எதிர்கொள்ளும் தற்போதைய நகரசபை உறுப்பினர் பார்த்தி கந்தவேளுடன் ஒரு மறு போட்டிக்கு வழிவகுக்கிறது.
Toronto நகரசபை உறுப்பினரும் தமிழருமான பார்த்தி கந்தவேள் Ontario மாகாண காவல்துறையினர் விசாரணையை எதிர் கொள்கிறார்.
அதேவேளை இதுவரை எந்த குற்றச்சாட்டும் சுமத்தப்படாத பார்த்தி கந்தவேளுக்கு எதிரான விசாரணையை தனது பிரச்சாரத்தின் மையமாக மாற்றும் நோக்கம் தனக்கு இல்லை என Kevin Rupasinghe தெளிவுபடுத்தினார்.
பார்த்தி கந்தவேள் மீண்டும் தேர்தலில் போட்டியிடும் முடிவை இதுவரை அறிவிக்கவில்லை.
மீண்டும் தேர்தலில் போட்டியிடப் போவதாக அவர் முன்னதாகவே ஊடகங்களிடம் தெரிவித்து வந்தார்.
Scarborough Southwest தொகுதியில் இதுவரை ஆறு வேட்பாளர்கள் வேட்புமனு தாக்கல் செய்துள்ளனர்.
நகரசபை அரசியலில் பதவியில் இருப்பவர்கள் பொதுவாக எளிதாக மீண்டும் தேர்ந்தெடுக்கப்படுவார்கள் என்பது குறிப்பிடத்தக்கது.
Ontario மாகாணத்தின் பல்வேறு நகரசபை பதவிகளுக்கான வேட்புமனு தாக்கல் May 1-ஆம் திகதி அதிகாரப்பூர்வமாக ஆரம்பித்து August 21 வரை தொடரவுள்ளது.
இந்தத் தேர்தல் October 26-ஆம் திகதி நடைபெறுவது இங்கு குறிப்பிடத்தக்கது.
