வட அமெரிக்க வர்த்தக ஒப்பந்தம் குறித்து பதட்டமடைய தேவையில்லை : Mark Wiseman

வட அமெரிக்க வர்த்தக ஒப்பந்தம் குறித்து பதட்டமடைய தேவையில்லை என அமெரிக்காவிற்கான கனடியத் தூதர் Mark Wiseman  வலியுறுத்துகின்றார்.

கனடா, அமெரிக்கா, மெக்சிகோ ஆகிய நாடுகள் தங்களது முத்தரப்பு வர்த்தக ஒப்பந்தத்தை புதுப்பிக்க அல்லது மறுபரிசீலனை செய்ய இன்னும் இரண்டு வாரங்களே உள்ள நிலையில் எவரும் பதற்றமடைய  தேவையில்லை என Mark Wiseman  வலியுறுத்துகின்றார்.

CUSMA காலக்கெடுவிற்கு முன்னதாக கனடாவின் அமெரிக்கத் தூதரின் இந்தக் கருத்து வெளியானது.

இந்த ஒப்பந்தத்தை இரத்து செய்யும் எண்ணம் இருப்பதாக அமெரிக்கா தரவில்லை எவரும் கூறவில்லை என்பதை Mark Wiseman சுட்டிக்காட்டினார்.

தடையற்ற வர்த்தக ஒப்பந்தத்தின் பரந்த சூழலில் July 1 காலக்கெடு முக்கியத்துவம் வாய்ந்ததல்ல என்றாலும், “பாதிப்பை” ஏற்படுத்தும் துறைசார் கட்டணங்களில் இருந்து சில நிவாரணங்களைப் பெறுவதற்காக, கனடிய அதிகாரிகள் முடிந்தவரை “விரைவாகவும் திறமையாகவும்” ஒரு ஒப்பந்தத்தை எட்டுவதில் கவனம் செலுத்துகின்றனர் என Mark Wiseman கூறினார்.

July 1-ஆம் திகதிக்குள், மூன்று நாடுகளின் அதிகாரிகள் கனடா, அமெரிக்கா, மெக்சிகோ ஒப்பந்தத்தை (CUSMA) 16 ஆண்டு காலத்திற்கு புதுப்பிக்க விரும்புகிறார்களா அல்லது வருடாந்த மறுஆய்வு செயல்முறைக்கு ஒப்புக்கொள்ள விரும்புகிறார்களா என்பதை தெரிவிக்க வேண்டும்.

CUSMA, அல்லது அமெரிக்காவில் USMCA என அறியப்படும் தடையற்ற வர்த்தக ஒப்பந்தம் கனடியப் பொருட்களை அமெரிக்க இறக்குமதி வரிகளின் பெரும் பகுதியில் இருந்து பாதுகாக்கிறது.

இந்த வர்த்தக ஒப்பந்தத்தை புதுப்பிப்பதில் தனக்கு ஆர்வம் இருப்பதாக கனடா ஏற்கனவே தெரிவித்துள்ளது.

இரண்டு வாரங்களுக்கு முன்னர், அமெரிக்கா, மெக்சிகோ ஆகிய நாடுகளுக்கு   எழுதிய கடிதத்தின் மூலம், இந்த ஒப்பந்தத்தைப் புதுப்பிப்பதற்கான கனடாவின் நோக்கங்களை கனடா-அமெரிக்க வர்த்தக அமைச்சர் Dominic LeBlanc தெளிவுபடுத்தினார்.

வட அமெரிக்க தடையற்ற வர்த்தக ஒப்பந்தத்தை புதுப்பிக்கும் எண்ணம் தனக்கு இல்லை என அமெரிக்க ஜனாதிபதி Donald Trump கடந்த வாரம் தெரிவித்திருந்தது குறிப்பிடத்தக்கது.