இந்தியாவை நம்பகமான வர்த்தக கூட்டாளியாக கனடா கருதுகிறது என பிரதமர் Mark Carney தெரிவித்தார்.
இரு நாடுகளும் உறவுகளை மீட்டெடுக்க முயற்சிக்கும் வேளையில் கனடிய பிரதமரின் இந்த கருத்து வெளியானது.
ஆனாலும் இந்தியா ஒரு நம்பகமான வர்த்தக கூட்டாளியா என்ற கேள்விக்கு பதிலளிக்க கனடாவின் சர்வதேச வர்த்தக அமைச்சர் Maninder Sidhu மறுத்தார்.
பல வருட பதற்றத்தின் பின்னர், அமெரிக்க வர்த்தக நிச்சயமற்ற தன்மைக்கு மத்தியில் இந்தியாவுடனான உறவுகளை மீட்டெடுக்க Mark Carney முயன்று வருகிறார்.
கடத்த June மாதம் Alberta-வில் நடைபெற்ற G7 உச்சி மாநாட்டிற்கு இந்தியப் பிரதமரை அழைத்தது இதில் அடங்குகிறது.
தென்னாப்பிரிக்காவில் நடந்த G20 உச்சி மாநாட்டின் ஒரு பகுதியாக சனிக்கிழமையும் (21) ஞாயிற்றுக்கிழமையும் (22) இரு தலைவர்களும் சந்தித்தனர்.
இந்த இருதரப்பு சந்திப்பின் கவனமும் பரந்த வர்த்தக உறவைப் பற்றி விவாதிப்பதாக இருக்கும் என முன்னதாக Mark Carney கூறியிருந்தார்.
2023-ஆம் ஆண்டு நிகழ்ந்த கனடிய சீக்கியத் தலைவரின் படுகொலையில் இந்திய அரசாங்கத்தின் முகவர்கள் ஈடுபட்டதாக நம்பகமான ஆதாரங்கள் இருப்பதாக முன்னாள் பிரதமர் Justin Trudeau நாடாளுமன்றத்தில் இரண்டு ஆண்டுகளுக்கு முன்னர் அறிவித்தார்.
ஒரு வருடத்தின் பின்னர், கனடாவை தளமாகக் கொண்ட இந்திய இராஜதந்திரிகள், தூதரக அதிகாரிகள் கொலைகள், மிரட்டி பணம் பறித்தல் உள்ளிட்ட கடுமையான குற்றச் செயல்களுடன் தொடர்புடைய இரகசிய நடவடிக்கைகளில் ஈடுபட்டதாக RCMP, மத்திய அரசாங்கம் குற்றம் சாட்டின.
இந்தக் குற்றச்சாட்டுகளுக்கு பதிலளிக்கும் விதமாக, கனடா ஆறு இந்திய இராஜதந்திரிகளை நாட்டில் இருந்து வெளியேற்றியது.
இந்தக் குற்றச்சாட்டுகளை மறுத்த இந்தியா தனது பங்கிற்கு ஆறு கனடிய இராஜதந்திரிகளை வெளியேற்றியது.
வெளியுறவு அமைச்சர் அனிதா ஆனந்த் இந்தியாவிற்கு விஜயம் செய்ததைத் தொடர்ந்து, October மாதத்தில் தூதர்கள் தங்கள் நாடுகளுக்கு திரும்ப அனுமதிக்க கனடாவும் இந்தியாவும் ஒப்புக்கொண்டன.
இந்தியா கனடாவின் ஏழாவது பெரிய வர்த்தக பங்காளியாகும்.
2024-ஆம் ஆண்டில் இரு நாடுகளுக்கும் இடையிலான இருவழி வர்த்தகம் மொத்தம் $30.9 பில்லியனாக இருந்தது.
கனடாவின் குடியேற்ற வாசிகளுக்கான மிகப்பெரிய மூல நாடாகவும் இந்தியா உள்ளது.
2024-ஆம் ஆண்டில் 393,000 வரையிலான இந்திய மாணவர்கள் கனடாவுக்கு வந்தனர்.
கனடாவில் இந்திய வம்சாவளியைச் சேர்ந்த 1.8 மில்லியனுக்கும் அதிகமானவர்கள் உள்ளனர்.
LJI Reporter ரம்யா சேது
