அமெரிக்காவுக்கு எதிரான வரி எதிர்ப்பு விளம்பரங்கள் குறித்து கனடிய முதல்வர்கள் மத்தியில் மாறுபட்ட கருத்துகள் நிலவுகின்றன.
முன்னாள் அமெரிக்க ஜனாதிபதி Ronald Reagan குரலைக் கொண்ட வரி எதிர்ப்பு விளம்பரங்களை Ontario அரசாங்கம் அண்மையில் வெளியிட்டிருந்தது
இந்த விளம்பரங்களுக்கு எதிர்ப்பு தெரிவிக்கும் வகையில் கனடாவுடனான வர்த்தக பேச்சுவார்த்தைகளை முடித்துக் கொள்ளும் முடிவை Donald Trump எடுத்தார்.
இந்த நிலையில் பிரதமர் Mark Carney-யுடன் கலந்துரையாடிய Ontario முதல்வர் Doug Ford, திங்கட்கிழமை (27) முதல் விளம்பரங்களை இடைநிறுத்த முடிவு செய்தார்.
அமெரிக்காவின் வரிகள் தொழிலாளர்கள், வணிகங்கள் மீது ஏற்படுத்தும் தாக்கம் குறித்து ஒரு உரையாடலை ஆரம்பிப்பதே இந்த விளம்பரங்களின் நோக்கமாக இருந்தது எனவும் Doug Ford தெரிவித்தார்.
Ontario-வின் இந்த முடிவை Alberta முதல்வர் வரவேற்றுள்ளார்.
Ontario-வின் விளம்பர பிரச்சாரம் இடைநிறுத்தப்படுவது குறித்து மகிழ்ச்சியடைவதாக முதல்வர் Danielle Smith கூறினார்.
அமெரிக்காவுடன் சுதந்திரமான வர்த்தக உடன்படிக்கை குறித்து பேச்சுவார்த்தைகளை தொடருமாறு மத்திய அரசாங்கத்தையும் அவர் வலியுறுத்தினார்.
இந்த விளம்பரம் குறித்து, மாநகரசபை முதல் மத்திய அரசு வரை கனடிய அரசியல்வாதிகள் பலரும் Ontario முதல்வரின் அணுகுமுறையை ஆதரிக்கின்றனர்.
“முதல்வரின் அணுகுமுறையை நான் ஆதரிக்கிறேன்,” என Brampton நகர முதல்வர் Patrick Brown கூறினார்.
வரிகள் குறித்த கனடிய மக்களின் விரக்தியைத் தெரிவிப்பதில் Doug Ford மிகவும் திறம்பட செயல்பட்டு வருவதாக Prince Edward Island முதல்வர் Rob Lantz தெரிவித்தார்.
Doug Ford ஒரு சிறந்த தேசபக்தர் என மத்திய Liberal அரசாங்கத்தின் நாடாளுமன்ற குழுத்த தலைவர் Steven MacKinnon கூறினார்.
இது போன்ற விளம்பரங்களை British Colombia மாகாணம் உருவாக்கும் என முதல்வர் David Eby கூறினார்.
இந்த வரி கட்டணங்கள் எவ்வாறு விலைகளை அதிகரிக்கின்றன என்பதை அமெரிக்கர்கள் அறிய வேண்டும் என தெரிவித்த அவர், தனது மாகாண வனத்துறை தொழிலாளர்களை பாதுகாக்க விளம்பரங்களை உருவாக உள்ளதாக கூறினார்.
சர்ச்சைக்குரிய Ontario-வின் விளம்பரம், வரிகள் குறித்த முன்னாள் அமெரிக்க ஜனாதிபதி Ronald Reagan-னின் பார்வையை “துல்லியமாகவும் சக்திவாய்ந்ததாகவும்” முன்வைப்பதாக Manitoba முதல்வர் கூறுகிறார்.
