கனடாவுக்கு எதிராக மேலதிகமாக 10 சதவீத வரியை அமெரிக்க ஜனாதிபதி அறிவித்தார்.
முன்னாள் அமெரிக்க ஜனாதிபதி Ronald Reagan குரலைக் கொண்ட வரி எதிர்ப்பு விளம்பரங்களை Ontario அரசாங்கம் அண்மையில் வெளியிட்டிருந்தது.
இந்த மாத ஆரம்பத்தில் $75 மில்லியன் செலவில் இந்த வரி எதிர்ப்பு விளம்பர பிரச்சாரத்தை Ontario அரசாங்கம் ஆரம்பித்தது.
இந்த விளம்பரம் January மாத இறுதி வரை தொடர திட்டமிடப்பட்டிருந்தது.
இந்த விளம்பரங்களுக்கு எதிர்ப்பு தெரிவிக்கும் வகையில் கனடாவுடனான வர்த்தக பேச்சுவார்த்தைகளை முடித்துக் கொள்ளும் முடிவை Donald Trump வியாழக்கிழமை (23) எடுத்தார்.
இதன் பின்னணியில் பிரதமர் Mark Carney-யுடன் கலந்துரையாடிய Ontario முதல்வர் Doug Ford, திங்கட்கிழமை (27) முதல் இந்த விளம்பரங்களை இடைநிறுத்த முடிவு செய்தார்.
ஆனாலும் கனடாவுக்கு எதிராக மேலதிகமாக 10 சதவீத வரியை Donald Trump சனிக்கிழமை (25) அறிவித்தார்.
Ontario அரசாங்கம் உடனடியாக குறிப்பிட்ட விளம்பரத்தை நிறுத்தவில்லை என்ற காரணத்தால் இந்த முடிவை எடுத்துள்ளதாக Donald Trump கூறினார்.
இந்த வரி ஏற்கனவே நடைமுறையில் உள்ள வரியை விட அதிகமாக இருக்கும் எனவும் அவர் கூறினார்.
தென்கிழக்கு நாடுகள் சங்கத்தின் (ASEAN) உச்சி மாநாட்டில் கலந்து கொள்வதற்காக மலேசியாவின் தலைநகர் கோலாலம்பூர் பயணிப்பதற்கு முன்னர் இந்த அறிவித்தலை Donald Trump வெளியிட்டார் .
இந்த மாநாட்டில் கனடிய பிரதமரும் கலந்து கொள்ளும் நிலையில், இருநாட்டு தலைவர்களும் சந்திக்கும் சாத்தியக்கூறு அதிகம் உள்ளது.
ASEAN மாநாட்டில் Donald Trump-புடன் நேரடி சந்திப்பு எதுவும் இதுவரை திட்டமிட படவில்லை என கனடிய பிரதமர் அலுவலகம் தெரிவித்தது.
அங்கு இரு தலைவர்களும் சந்திப்பதற்கான சாத்தியக்கூறுகள் அதிகம் என அதிகாரிகள் கூறுகின்றனர்.
ஆனாலும் கனடிய பிரதமரை ASEAN மாநாட்டில் சந்திக்கும் எண்ணம் தனக்கு இல்லை என தன்னுடன் பயணம் செய்யும் செய்தியாளர்களிடம் Donald Trump கூறினார்.
புதிதாக அறிவிக்கப்பட்ட கட்டணம் எதற்கு பொருந்தும், அல்லது எப்போது அமுலுக்கு வரும் போன்ற விபரங்கள் உடனடியாக வெளியாகவில்லை.
இந்த அறிவித்தல் குறித்து வெள்ளை மாளிகையோ அல்லது கனடிய பிரதமர் அலுவலகமோ கருத்து தெரிவிக்கவில்லை.
அமெரிக்காவின் வர்த்தக கொள்கையை நாங்கள் கட்டுப்படுத்த முடியாது என Mark Carney வெள்ளிக்கிழமை (24) தெரிவித்தார் என்பது குறிப்பிடத்தக்கது.
