Conservative கட்சித் தலைவரின் அலுவலகத்தில் இருந்து ஐந்து மூத்த ஊழியர்கள் தொடர் பதவி விலகலை கட்சித் தலைவர் சாதாரணமான ஒரு நிகழ்வாக குறிப்பிட்டுள்ளார்.
Conservative கட்சித் தலைவர் அலுவலகத்தில் இருந்து ஐந்து மூத்த ஊழியர்கள் அடுத்தடுத்து பதவி விலக உள்ளதாக தகவல் வெளியானது.
இந்த விவகாரத்தை Pierre Poilievre சாதாரணமான ஒரு நிகழ்வாகக் குறிப்பிட்டுள்ளார்.
100 ஊழியர்கள் பணியாற்றும் அலுவலகத்தில் ஐந்து பேர் பல ஆண்டுகள் பணியாற்றிய பின்னர் விலகுவது இயல்பானதே என அவர் தெரிவித்துள்ளார்.
Québec மாகாணத்தின் Saint-Hyacinthe தொகுதியில் வியாழக்கிழமை (19) நடைபெற்ற செய்தியாளர் சந்திப்பில் பேசிய அவர் இந்தக் கருத்தை கூறினார்.
தன்னிடம் பல ஆண்டுகள் பணியாற்றிய ஐந்து ஊழியர்கள் விலகும்போது, தனது தலைமைத்துவத்திற்கு தங்களின் வலுவான ஆதரவைத் தெரிவித்து செல்கின்றனர் எனவும் அவர் குறிப்பிட்டார்.
மக்களின் வாழ்வாதார செலவு, குற்ற விகிதங்கள், குடியேற்றம் போன்ற உண்மையான பிரச்சினைகளிலும், சாதாரண மக்களின் வாழ்க்கையிலும் நாம் கவனம் செலுத்த வேண்டும் என்பதையே இது நினைவூட்டுகிறது எனவும் அவர் குறிப்பிட்டார்.
கனடியர்களுக்காகப் பிரதமர் Mark Carney அரசு உண்மையில் என்ன செய்து கொண்டிருக்கிறது என்பதன் முடிவுகளையே நாம் பார்க்க வேண்டும் எனவும் Pierre Poilievre வலியுறுத்தினார்.
எதிர்க்கட்சித் தலைவர் அலுவலகத்தின் ஊடகத் தொடர்பு இயக்குனர் Micah Green, ஊடக உறவுகள் இயக்குனர் Sam Lilly, நிர்வாக உதவியாளர் Hayley Quipp, துணைத் தலைமை அதிகாரி Aaron Wudrick, மூத்த கொள்கை ஆலோசகர் Andrew Evans ஆகியோர் பதவி விலக உள்ளதாக தெரியவருகிறது.
எதிர்வரும் 7-ஆம் திகதி நடைபெறவுள்ள ஆறு நாடாளுமன்ற இடைத் தேர்தல்களை Conservative கட்சி எதிர்கொள்ள உள்ள சூழலில் இந்த பதவி விலகல்கள் நிகழ்கின்றன.
கடந்த ஆண்டு நடைபெற்ற பொதுத் தேர்தலுக்குப் பின்னர் இதுவரை 8 Conservative நாடாளுமன்ற உறுப்பினர்கள் கட்சியிலிருந்து விலகி உள்ளது, அவர்களில் 4 பேர் Liberal கட்சியில் இணைந்ததன் மூலம் Mark Carney அரசு பெரும்பான்மை பெற்றது குறிப்பிடத்தக்கது
