Nova Scotia மாகாணத்தின் தெற்கு Cape Breton பகுதியில் அமைப்பதற்குத் திட்டமிடப்பட்டுள்ள சர்ச்சைக்குரிய செயற்கை நுண்ணறிவு தரவு மையத்திற்கு எதிராக மாகாணம் முழுவதும் போராட்டங்கள் முன்னெடுக்கப்பட்டன.
பொதுமக்கள், சுற்றுச்சூழல் ஆர்வலர்களுடன் திரண்டு சனிக்கிழமை (07) இந்த பிரம்மாண்ட போராட்டங்களை நடத்தியுள்ளனர்.
இதில் மாகாணசபை வளாகத்தை முற்றுகையிட்ட ஆர்ப்பாட்டக்காரர்கள் பிரதான போராட்டத்தை முன்னெடுத்தனர்.
Halifax நகரில் உள்ள மாகாணசபைக் கட்டிடத்தின் முன் கூடிய நூற்றுக்கணக்கான போராட்டக்காரர்கள் பதாகைகளை ஏந்தி தங்களின் கடுமையான எதிர்ப்பை வெளிப்படுத்தியுள்ளனர்.
சுற்றுச்சூழல் மற்றும் நீர் வளம் பாதிப்பு, அதிக மின்சார நுகர்வு ஆகியவை போராட்டக்காரர்களின் எதிர்ப்பின் பிரதான கவலைகளாக அமைந்தன.
AI தரவு மையங்கள் அமைக்கப்படும் போது அதன் இயந்திரங்களை குளிர்விப்பதற்காக உறிஞ்சப்படும் தண்ணீரினால் உள்ளூர் நீர் ஆதாரங்கள் வற்றி சுற்றுச்சூழல் சமநிலை முற்றிலும் சீர்குலையும் என ஆர்வலர்கள் எச்சரிக்கின்றனர்.
தவிரவும் இந்தத் தரவு மையங்களின் செயல்பாட்டிற்கு அதிக அளவிலான மின்சாரம் தேவைப்படும் காரணத்தால், அது மாகாணத்தின் ஒட்டுமொத்த மின்சாரக் கட்டமைப்பிற்கு பெரும் அழுத்தத்தை ஏற்படுத்தி சாதாரண மக்களின் மின் கட்டணங்களை அதிகரிக்க வழிவகுக்கும் எனவும் குற்றம் சாட்டப்பட்டுள்ளது.
