அமெரிக்க ஜனாதிபதி கனடா மீது விதித்து வரும் அதிரடி வர்த்தக வரிகளை அமெரிக்காவின் முன்னாள் ஜனாதிபதி கண்டித்தார்.
அமெரிக்க ஜனாதிபதி Donald Trump நிர்வாகம் நட்பு நாடான கனடாவை ஒரு ‘குப்பை’ போல நடத்துவதாக அமெரிக்காவின் முன்னாள் ஜனாதிபதி Bill Clinton மிகக் கடுமையான குற்றச்சாட்டுகளை முன்வைத்துள்ளார்.
கனடா மீது Donald Trump விதித்து வரும் அதிரடி வர்த்தக வரிகளுக்கு எதிராக கருத்து தெரிவித்த Bill Clinton, கனடியப் பிரதமருக்கு தனது பகிரங்க ஆதரவை தெரிவித்துள்ளார்.
கனடிய பிரதமர் Mark Carney தனது ‘நெருங்கிய நீண்டகால நண்பர்’ என அவர் குறிப்பிட்டார்.
அமெரிக்க தலைநகரில் நடைபெற்ற தேர்தல் பிரச்சார நிகழ்வில் செவ்வாய்க்கிழமை (20) கலந்து கொண்டு பேசிய போது Bill Clinton இந்த அதிரடி கருத்துக்களைப் பதிவு செய்தார்.
உலகளாவிய பொருளாதார கொள்கைகளை வடிவமைப்பதில் கனடிய பிரதமரின் நிபுணத்துவத்தை அவர் புகழ்ந்துரைத்தார்.
எல்லையில் தேவையின்றி வர்த்தகப் போரை ஆரம்பித்து வரிகளை விதிப்பது இரு நாடுகளின் பொருளாதார பாதுகாப்பிற்கும் உகந்ததல்ல எனவும் அவர் எச்சரித்தார்.
கனடாவையும், கனடிய அரசியல் தலைவர்களையும் அமெரிக்க ஜனாதிபதி தொடர்ந்து அவமானப்படுத்தும் வகையில் விமர்சித்து வரும் நிலையில் அமெரிக்காவின் முன்னாள் ஜனாதிபதியின் இந்தக் கருத்து வெளியாகியுள்ளது.
