அமெரிக்காவின் குடியரசு கட்சி நிர்வாகிகள் சிலர் Alberta மாகாணப் பிரிவினைவாதிகளுடன் இரகசியமாகக் கைகோர்த்துச் செயல்பட்டு வருவதாக வெளியாகியுள்ள தகவல்கள் கவலையளிப்பதாக தெரிவிக்கப்படுகிறது.
கனடாவின் பிரதான எதிர்க்கட்சியான Conservative கட்சி நாடாளுமன்ற உறுப்பினர் Dane Lloyd இந்த பகிரங்க எச்சரிக்கையை விடுத்துள்ளார்.
Alberta மாகாணத்தைக் கனடாவில் இருந்து முற்றிலும் பிரித்துத் தனிநாடாக அறிவிக்கக் கோரி நடத்தப்பட இருக்கும் சுதந்திரப் பொதுவாக்கெடுப்பு பிரச்சாரங்களுக்கு, அமெரிக்கக் குடியரசுக் கட்சியின் தீவிர உத்திகளை வகுக்கும் சில முக்கிய முகவர்கள் உதவிகளை வழங்கி வருவது கண்டறியப்பட்டுள்ளது.
இது கனடாவின் தேசிய பாதுகாப்பிற்கு பெரும் அச்சுறுத்தலை ஏற்படுத்துவதாக Conservative கட்சியின் Parkland தொகுதி நாடாளுமன்ற உறுப்பினரான Dane Lloyd கூறினார்.
இது கனடிய அரசியலில் வெளிநாட்டு அரசியல் ஊடுருவலாக அமைவதாக அவர் தெரிவித்தார்.
Conservative கட்சியின் வழக்கமான வரம்புகளைத் தாண்டி இந்த விடயத்தில் நாடாளுமன்ற உறுப்பினர் Dane Lloyd கண்டனம் தெரிவித்துள்ளார்
கனடாவின் இறையாண்மைக்காக பொதுவெளியில் பேசியுள்ள அவர், வெளிநாட்டு அரசியல் சக்திகள் கனடாவின் கூட்டாட்சி அமைப்பை உடைக்க முயல்வதை எவ்விதத்திலும் ஏற்றுக்கொள்ள முடியாது என வலியுறுத்தினார்.
இது கனடிய ஜனநாயகக் கட்டமைப்பின் மீதான அப்பட்டமான அத்துமீறல் எனவும் நாடாளுமன்ற உறுப்பினர் Dane Lloyd சாடியுள்ளார்.
