Ontario மாகாணம் Hamilton நகரைத் தளமாகக் கொண்டு இயங்கும் air ambulance மருத்துவ மீட்பு விமானம் ஒன்று 6 பேருடன் காணாமல் போயுள்ளது.
இந்த விமானம் நோயாளி உட்பட 6 பேருடன் அமெரிக்காவின் Massachusetts கடல் பகுதியில் திடீரென காணாமல் போயுள்ளது.
இந்த மருத்துவ அவசரப் பயணத்தில் இரண்டு விமானிகள், இரண்டு மருத்துவப் பணியாளர்கள் என 4 கனடிய ஊழியர்களுடன், ஒரு நோயாளி, அவரது குடும்ப உறுப்பினர் என மொத்தம் 6 பேர் இருந்துள்ளனர்.
நடுவானில் மாயமான இந்த விமானத்தை தேடி கண்டுபிடிக்க அமெரிக்கக் கடலோரக் காவல் படையினர் (U.S. Coast Guard) கப்பல்கள், விமானங்கள் மூலம் கடலில் தீவிர தேடுதல் வேட்டையை முடுக்கி விட்டுள்ளனர்.
இந்த விமானம் Hamilton நகரைத் தளமாகக் கொண்ட Latitude Air Ambulance நிறுவனத்துக்குச் சொந்தமான Gulfstream G100 ரக jet விமானமாகும்.
இந்த விமானம் வெள்ளிக்கிழமை (02) மாலை Hamilton-னிலிருந்து Atlantic தீவான Bermuda-விற்கு சென்றுள்ளது.
பின்னர், Bermuda-விலிருந்து Boston நோக்கி நோயாளி ஒருவரை ஏற்றிச் சென்ற போது, சனிக்கிழமை (03) அதிகாலை 1:20 மணி அளவில் அமெரிக்கப் federal விமான போக்குவரத்து அமைப்பின் (FAA) கட்டுப்பாட்டு அறையுடனான தொடர்பை முற்றிலும் இழந்தது.
அமெரிக்கக் கடலோரக் காவல் படையின் வடகிழக்குப் பிரிவு விடுத்துள்ள X தளப் பதிவின்படி, Boston நகருக்கு தென் கிழக்கே அமைந்துள்ள Nantucket தீவின் கடல் பகுதியில் இந்த விமானம் விழுந்திருக்கலாம் என சந்தேகிக்கப்படுகிறது.
விமானம் கட்டுப்பாட்டு அறையுடனான தொடர்பை இழப்பதற்கு சில நிமிடங்களுக்கு முன்னதாக அவசர நிலை எச்சரிக்கை குறித்து விமானி NewYork கட்டுப்பாட்டு அறையுடன் பதற்றத்துடன் பேசியுள்ளனர்.
இதன் பின்னர் விமானத்தின் தொடர்பு துண்டிக்கப்பட்டுள்ளது.
இந்த விமானம், Ontario மாகாணத்தின் அதிகாரப்பூர்வ மருத்துவ விநியோகச் சேவையுடனோ அல்லது ‘Ornge’ அமைப்பின் செயல்பாடுகளுடனோ எவ்விதத் தொடர்பும் இல்லாதது எனத் தெளிவுபடுத்தப்பட்டுள்ளது.
இருப்பினும் இச்சம்பவம் மிகுந்த கவலையளிப்பதாக தெரிவித்த Ornge’ மருத்துவ விமானச் சேவை அமைப்பின் செய்தித் தொடர்பாளர் Joshua McNamara , இதில் “பயணித்த அனைவரும் பாதுகாப்பாக மீட்கப்பட வேண்டும் என நம்புகிறோம்” என தெரிவித்துள்ளார்.
இந்த விமானத்திற்கு உண்மையில் என்ன நேர்ந்தது என்பதைத் துல்லியமாக மதிப்பிடுவதற்காக தங்களது வாரியம் தற்பொழுது தீவிரத் தகவல்களைச் சேகரித்து வருவதாக கனடா போக்குவரத்து பாதுகாப்பு வாரியத்தின் செய்தித் தொடர்பாளர் Hugo Fontaine கூறினார்.
இந்த சம்பவம் குறித்து கனடாவின் போக்குவரத்து அமைச்சகம், Ontario போக்குவரத்து அமைச்சம் இதுவரை கருத்துகள் எதையும் தெரிவிக்கவில்லை.
