Toronto நகர முதல்வர் தேர்தல் நெருங்கி வரும் நிலையில் முன்னணி வேட்பாளர்களுக்கு இடையே நடைபெற்ற நேரடி விவாதம் கடும் வாக்குவாதங்கள் நிறைந்ததாக மாறியுள்ளது.
நகர முதல்வர் Olivia Chow, நகர சபை உறுப்பினர் Brad Bradford, முன்னாள் மத்திய அமைச்சர் Chris Alexander ஆகிய மூன்று முன்னணி வேட்பாளர்கள் செவ்வாய்க்கிழமை (22) நடைபெற்ற விவாதத்தில் பங்கேற்றனர்.
இந்த விவாதத்தின் முக்கிய பேசுபொருளாக சொத்து வரி, பொதுப் போக்குவரத்து, வீட்டுவசதி, மக்கள் தொகை நெருக்கம் ஆகியன அமைந்தன.
நகர முதல்வர் Olivia Chow, நகரின் நிதி நிலையை சீரமைக்க கடந்த கால வரி உயர்வுகள் தேவைப்பட்டன என தனது நிதிக்கொள்கையை தற்காத்துப் பேசினார்.
தான் நகர முதல்வராக தேர்ந்தெடுக்கப்பட்டால் முதல் ஆண்டில் சொத்து வரியை முழுமையாக முடக்குவதாக Brad Bradford உறுதியளித்தார்.
நகரில் வீடுகளின் எண்ணிக்கையை அதிகரிப்பது, குறிப்பிட்ட பகுதிகளில் அடுக்குமாடி குடியிருப்புகளின் அடர்த்தியை அனுமதிப்பது தொடர்பாக வேட்பாளர்களிடையே கடுமையான வாக்குவாதங்களும் கருத்து மோதல்களும் ஏற்பட்டன.
Toronto நகரத்தின் தற்போதைய பொருளாதார சூழ்நிலை, வரிகள், மக்களின் அன்றாட வாழ்க்கைச் செலவினங்களைக் கட்டுப்படுத்துவது குறித்து வேட்பாளர்கள் தங்களின் மாறுபட்ட திட்டங்களை முன்வைத்து விவாதித்தனர்.
நகர வாசிகள் எதிர்கொள்ளும் மிக முக்கிய சவாலான வீட்டுவசதி, வாடகை உயர்வு பிரச்சனைகளுக்குத் தீர்வு காண்பது குறித்து வேட்பாளர்கள் இடையே கடுமையான வாக்குவாதங்கள் நிகழ்ந்தன.
October 26 அன்று தேர்தலுக்கு முன்னதாக, பிரதான மூன்று வேட்பாளர்களுக்கும் இடையே மேலும் விவாதங்கள் நடைபெற ஏற்பாடாகியுள்ளது.
