Scarborough நாடாளுமன்ற உறுப்பினரின் இல்லத்தில் அவரது வாகனம் உட்பட மூன்று வாகனங்கள் எரித்து சேதமாக்கப்பட்டது.
தனது வாகனம் தீ வைத்து எரிக்கப்பட்டதாக Liberal கட்சி நாடாளுமன்ற உறுப்பினர் Salma Zahid தெரிவித்துள்ளார்.
சந்தேக நபர் தனது வாகனத்தையும் மற்றும் இரண்டு வாகனங்களையும் தீயிட்டுக் கொளுத்தியதாக அவர் குற்றம் சாட்டினார்.
சந்தேகத்திற்கிடமான இந்த தீ வைப்பு சம்பவம் குறித்து Toronto காவல்துறையினர் விசாரணையை முன்னெடுக்கின்றனர்.
நாடாளுமன்ற உறுப்பினரின் இல்லத்திற்கு வெளியே, தீ வைப்பு சம்பவம் என சந்தேகிக்கப்படும் ஒரு நிகழ்வில் மூன்று வாகனங்கள் வியாழக்கிழமை (27) அதிகாலை சேதமாக்கப்பட்டன.
Scarborough Centre-Don Valley East தொகுதியின் Liberal நாடாளுமன்ற உறுப்பினர் Salma Zahid இல்லத்தில், அதிகாலை 1:30 மணியளவில் இந்த சம்பவம் நிகழ்ந்தது.
Scarborough-வில் Bellamy Road North – Lawrence Avenue East சந்திப்புக்கு அருகாமையில் அவரது இல்லம் அமைந்துள்ளது.
Toronto தீயணைப்பு பிரிவினரும் காவல்துறையினரும் சம்பவ இடத்திற்கு வரவழைக்கப்பட்ட நிலையில், தீயணைப்பு படையினர் தீயை அணைத்தனர்.
இதில் இரண்டு வாகனங்களும் முற்றாக அழிந்து விட்டதாக Salma Zahid கூறினார்.
ஆனாலும் அவரது இல்லத்திற்கு எந்த சேதமும் ஏற்படவில்லை.
குறிப்பிட்ட தீயை அவதானித்த தனது மகனும், அண்டை வீட்டாருடன் அவசர உதவி பிரிவினரை அழைத்ததாகவும், தானும் தனது குடும்பத்தினரும் பாதுகாப்பாக இருப்பதாகவும் Salma Zahid X தளத்தில் பதிவிடப்பட்ட அறிக்கையில் தெரிவித்தார்.
இந்தத் தீயின் காரணமாக தனது வாகனமும் மற்றொரு வாகனமும் அழிந்துவிட்டதாக அவர் கூறினார்.
இதில் மூன்றாவது வாகனம் ஒன்று சேதமடைந்ததாக காவல்துறையினர் தெரிவித்தனர்..
இந்தத் தீக்கான சாத்தியக்கூறு குறித்து ஊகிக்க விரும்பவில்லை என தெரிவித்த Salma Zahid , காவல்துறையினர் விசாரணையின் முடிவுகளுக்காக காத்திருப்பதாக தெரிவித்தார்.
இத்தகைய தாக்குதல்கள் ஏற்றுக்கொள்ள முடியாதவை என குறிப்பிட்ட அவர், அவை தனது தொகுதி மக்களுக்கு சேவை செய்யும் பணியில் இருந்து தன்னைத் தடுக்காது எனவும் கூறினார்.
தனது பாதுகாப்பு, தனது ஊழியர்களின் பாதுகாப்பு, தனது குடும்பத்தின் பாதுகாப்பு குறித்து தான் கவலை அடைவதாகவும் Salma Zahid தெரிவித்தார்.
இதன் எதிரொலியாக தனது தொகுதி அலுவலகத்தை வியாழனன்று மூடவும் அவர் முடிவு செய்தார்.
இந்தச் சம்பவத்தை வேண்டுமென்றே தீ வைக்கப்பட்ட ஒன்றாக இருக்கலாம் என்ற கோணத்தில் விசாரித்து வருவதாக Toronto காவல்துறையினர் தெரிவித்துள்ளனர்.
இருப்பினும், சந்தேக நபர்கள் குறித்த எந்தத் தகவலும் தற்போது இல்லை எனவும் காவல்துறையினர் கூறுகின்றனர்.
இந்த சம்பவம் குறித்து பிரதமர் Mark Carney உட்பட அரசியல் தலைவர்கள் கண்டனம் தெரிவித்துள்ளனர்.
இது ஒரு “கோழைத்தனமான வன்முறை மற்றும் மிரட்டல் செயல் என Mark Carney ஒரு அறிக்கையில் தெரிவித்தார்.
இதற்கு பொறுப்பான நபரை தேடும் காவல்துறைக்கு தனது முழு ஆதரவு உண்டு எனவும் அவர் கூறினார்.
இந்தக் கோழைத்தனமான தாக்குதலுக்குக் காரணமானவரை கைது சட்டத்தின் முன் நிறுத்த வேண்டும் என Conservative தலைவர் Pierre Poilievre தெரிவித்தார்.
கோழைத்தனமான வன்முறை செயல்களை ஏற்றுக்கொள்ள முடியாது என Toronto நகர முதல்வர் Olivia Chow இந்த சம்பவம் குறித்த தனது கண்டனத்தை தெரிவித்தார்.
அமைச்சர் ஹரி ஆனந்தசங்கரி, நாடாளுமன்ற உறுப்பினர் ஜுவனீட்டா நாதன் உள்ளிட்ட பலரும் இந்த சம்பவத்திற்கு தமது கண்டனத்தை தெரிவித்து வருகின்றனர்.
இந்தச் சம்பவத்தை “மிகவும் கவலைக்குரியது” என Ontario NDP தலைவர் Marit Stiles குறிப்பிட்டார்.
கனடிய முஸ்லிம்களுக்கான தேசிய சபை இந்தச் சம்பவத்தை கண்டித்து அறிக்கை ஒன்றை வெளியிட்டது.
Salma Zahid முதன் முதலில் 2015-இல் Scarborough Centre தொகுதியின் நாடாளுமன்ற உறுப்பினராக தேர்ந்தெடுக்கப்பட்டார்.
