British Colombia மாகாணத்தில் சில பகுதிகளில் காட்டுத்தீ தொடர்ந்து கட்டுப்பாடின்றி எரிந்து கொண்டிருக்கிறது.
புதிய காட்டுத்தீகள் உருவாகி வேகமாக பரவக்கூடிய சாத்தியக்கூறு தொடர்ந்து உள்ளதாக எச்சரிக்கப்படுகிறது.
காட்டுத்தீ தொடர்ந்து பரவி வருவதால், அதை எதிர்கொள்ளும் பணியில் ஈடுபட்டுள்ள அதிகாரிகளால் முன்கூட்டியே திட்டமிடுவதில் சவால்கள் ஏற்படுவதாக அவர்கள் தெரிவிக்கின்றனர்.
இந்த நிலையில் மத்திய, தெற்கு உட்புறப் பகுதிகளில் உள்ள பிராந்தியங்களுக்கு மாகாண அரசாங்கம் மஞ்சள், ஆரஞ்சு நிறத்திலான காற்று தர எச்சரிக்கைகளை வெளியிட்டது.
Summerland பகுதிக்கான வெளியேற்ற உத்தரவுகள் அல்லது எச்சரிக்கைகளை காட்டுத் தீ கட்டுக்குள் வரும் வரை நீக்குவது குறித்து பரிசீலிக்க முடியாது என நகர முதல்வர் Doug Holmes கூறினார்.
Summerland பகுதியில் தங்கள் வீடுகளை விட்டு வெளியேறிய குடும்பங்களிடம் இருந்து அதிருப்திக்குரிய கருத்துகள் வெளியாகி வருவதாக பிராந்திய அதிகாரிகள் தெரிவித்த நிலையில் நகர முதல்வரின் இந்த அறிவித்தல் வெளியானது.
