CUSMA காலக்கெடு நெருங்கி வரும் நிலையில், கனடாவும் அமெரிக்காவும் ஒப்பந்தத்தை எட்டும் நிலையில் இல்லை என கனடாவுக்கான அமெரிக்கத் தூதர் Pete Hoekstra தெரிவித்தார்.
கனடா-அமெரிக்கா-மெக்சிகோ ஒப்பந்தத்தைப் புதுப்பிக்கவோ அல்லது மறு ஆய்வு செய்யவோ July 1 காலக்கெடு நெருங்கி வரும் நிலையில் இந்த கருத்து வெளியானது.
எந்த விதமான இடைக்கால ஒப்பந்தத்தையும் அறிவிக்கும் நிலைக்கு இன்னும் வரவில்லை என கனடிய தொலைக்காட்சிக்கு வழங்கிய செவ்வியில் அவர் கூறினார்.
இதில் அடுத்த கட்ட நடவடிக்கைகள் என்ன என்பதையும், நாம் எந்தத் திசையில் பயணிக்கிறோம் என்பதையும் அமெரிக்க ஜனாதிபதியும், கனடிய பிரதமரும் தீர்மானிப்பார்கள் என கருதுவதாக Pete Hoekstra மேலும் கூறினார்.
அமெரிக்க ஜனாதிபதி Donald Trump-பின் முதல் பதவிக்காலத்தில் கையெழுத்திடப்பட்ட இந்த முத்தரப்பு வர்த்தக ஒப்பந்தம், ஒரு முக்கியமான காலக்கெடுவை நெருங்கி வருகிறது.
July 1-ஆம் திகதிக்குள், மூன்று நாடுகளின் அதிகாரிகளும், CUSMA ஒப்பந்தத்தை 16 ஆண்டு காலத்திற்கு புதுப்பிக்க விரும்புகிறார்களா அல்லது வருடாந்த மறு ஆய்வு செயல்முறைக்கு ஒப்புக்கொள்ள விரும்புகிறார்களா என்பதை தத்தமது அதிகாரிகளுக்கு தெரிவிக்க வேண்டும்.
கனடாவும் மெக்சிகோவும் CUSMA ஒப்பந்தத்தை 16 ஆண்டுகளுக்கு நீட்டிக்க விரும்புவதாக ஏற்கனவே முறைப்படி அறிவித்துள்ளன.
ஆனால் இதில் அமெரிக்காவின் நிலைப்பாடு இன்னும் தெளிவாக வெளியாகவில்லை.
