Gordie Howe சர்வதேச மேம்பால திறப்பு தாமதமானது.
இந்த வாரம் திறக்கப்படும் என எதிர்பார்க்கப்பட்ட Gordie Howe சர்வதேச மேம்பால திறப்பு தாமதமாவதாக அறிவிக்கப்படுகிறது.
இந்த சர்வதேசப் பாலத்தின் திறப்பு விழாவை ஒத்திவைக்க கனடாவும் அமெரிக்காவும் ஒப்புக் கொண்டுள்ளன.
நிலுவையில் உள்ள பிரச்சினைகளை கையாள்வதற்கு கூடுதல் அவகாசம் அளிப்பதற்காக இந்த முடிவு எடுக்கப்பட்டுள்ளதாக Windsor-Detroit பால ஆணையம் வெளியிட்டுள்ள அறிக்கையில் தெரிவிக்கப்படுகிறது.
இந்த எல்லை தாண்டிய பாலத்தின் செயல்பாடுகளை ஆரம்பிப்பதற்கு முன்பாக தயாராக இருப்பதை உறுதி செய்வதற்கான ஒரு கூட்டு உறுதிப்பாட்டை இந்த முடிவு பிரதிபலிக்கிறது என பால ஆணையத்தின் இடைக்கால தலைமை நிர்வாக அதிகாரி Chuck Andary கூறினார்.
கனடாவையும், அமெரிக்காவையும் இணைக்கும் இந்த புதிய Windsor-Detroit மேம்பாலம் இரு நாடுகளுக்குமான ஒரு முக்கியப் பொருளாதார இணைப்பாக அமையும் எனவும் அவர் நம்பிக்கை தெரிவித்தார்.
இந்த நிலையில் பாலம் திறக்கப்படுவதற்கான புதிய காலக்கெடு எதுவும் இதுவரை அறிவிக்கப்படவில்லை.
இந்த பாலம் இரு நாடுகளுக்கு இடையேயான ஒத்துழைப்பின் சின்னம் என இந்த வாரம் கனடிய பிரதமர் Mark Carney கூறியிருந்தார்.
அமெரிக்காவின் Michigan மாநிலத்தையும் கனடாவின் Ontario மாகாணத்தையும் இணைக்கும் $6.4 பில்லியன் மதிப்பிலான இந்த மேம்பால திட்டத்தின் கட்டுமானப் பணிகள் எட்டு ஆண்டுகள் தொடர்ந்தன.
இந்தப் பாலம் திறக்கப்படுவதை தடுக்க அமெரிக்க ஜனாதிபதி Donald Trump இந்த ஆண்டின் ஆரம்பத்தில் அச்சுறுத்தல் விடுத்திருந்தார் என்பது இங்கு குறிப்பிடத்தக்கது.
