Gordie Howe சர்வதேச மேம்பாலம் இந்த வாரம் திறக்கப்படும் என பிரதமர் Mark Carney உறுதிப்படுத்தினார்.
கனடாவையும், அமெரிக்காவையும் இணைக்கும் இந்த புதிய Windsor-Detroit மேம்பாலத்திற்கான திறப்பு விழா வெள்ளிக்கிழமை (12) நடைபெறும் என செய்தி வெளியாகியிருந்தது.
இந்த நிலையில் குறிப்பிட்ட மேம்பாலத்தின் திறப்பு விழாவை Mark Carney செவ்வாய்கிழமை (09) உறுதிப்படுத்தினார்.
நீண்டகாலமாக எதிர்பார்க்கப்பட்ட இந்த சர்வதேசப் பாலத்தின் திறப்பை “ஒரு நல்ல செய்தி” என பிரதமர் வர்ணித்துள்ளார்.
இந்த பாலம் நமது நாடுகளுக்கு இடையேயான ஒத்துழைப்பின் சின்னம் என அமைச்சரவை கூட்டத்திற்கு முன்னதாக செய்தியாளர்களிடம் Mark Carney கூறினார்.
அமெரிக்காவின் Michigan மாநிலத்தையும் கனடாவின் Ontario மாகாணத்தையும் இணைக்கும் $6.4 பில்லியன் மதிப்பிலான இந்த மேம்பால திட்டத்தின் எட்டு ஆண்டுகால கட்டுமானப் பணிகள் நிறைவடைவதை இந்த திறப்பு விழா குறிக்கிறது.
ஆனாலும் இந்த திறப்பு விழா குறித்து தமக்கு தெரிவிக்கப்படவில்லை என Windsor நகர முதல்வர் தெரிவித்தார்.
இதற்கிடையில், Detroit முதல்வர் Mary Sheffield அலுவலகம், இந்த திறப்பு விழா குறித்து தமக்கு நேரடித் தகவல் எதுவும் கிடைக்கவில்லை என தெரிவித்துள்ளது.
இந்தப் பாலம் திறக்கப்படுவதை தடுக்க அமெரிக்க ஜனாதிபதி Donald Trump இந்த ஆண்டின் ஆரம்பத்தில் அச்சுறுத்தல் விடுத்திருந்தார் என்பது இங்கு குறிப்பிடத்தக்கது.
