Toronto யூத சமூகத்தினரை குறிவைத்து நடத்தப்பட்ட இரண்டு வெறுப்புணர்ச்சி தாக்குதல்கள் தொடர்பாக மேலும் நான்கு சந்தேக நபர்கள் கைது செய்யப்பட்டனர்.
புதன்கிழமை (03) இந்த கைது குறித்து காவல்துறை அறிவித்துள்ளது.
இதில் முதல் தாக்குதல் April 30 அன்று Bathurst Street and Lawrence Avenue மேற்குப் பகுதியில் நிகழ்ந்தது.
இதில் பாதிக்கப்பட்டவர்களுக்கு சிறிய காயங்கள் ஏற்பட்ட நிலையில், சந்தேக நபர்கள் சம்பவ இடத்தில் இருந்து தப்பிச் சென்றனர்.
May 7 அன்று, Bathurst Street and நெடுஞ்சாலை 401 பகுதியில் இதுபோன்ற தாக்குதல் ஒன்று நிகழ்ந்தது.
இந்த இரண்டு தாக்குதல்களும் முன்கூட்டியே “ஒழுங்கமைக்கப்பட்டு திட்டமிடப்பட்டவை” என புதன்கிழமை காவல்துறை தெரிவித்தது.
Vaughan நகரைச் சேர்ந்த 18 வயதான Ruslan Novruzov என்ற சந்தேக நபர், இந்தத் தாக்குதல்கள் தொடர்பாக ஏற்கனவே கைது செய்யப்பட்டிருந்தார்.
தவிரவும் இரண்டு சிறுவர்கள் உட்பட மேலும் நான்கு சந்தேக நபர்கள் May 22 அன்று கைது செய்யப்பட்டு, அவர்கள் மீது குற்றம் சாட்டப்பட்டது.
20 வயதான Toronto நகரை சேர்ந்த Luka Chokheli, 23 வயதான Toronto நகரை சேர்ந்த Alishahin Isayev, Toronto நகரை சேர்ந்த 16 வயதான பெயர் வெளியிடப்படாத ஆண், Thornhill நகரை சேர்ந்த 17 வயதான பெயர் வெளியிடப்படாத பெண் ஆகியோர் குற்றச்சாட்டுகளை எதிர்கொள்கின்றனர்.
இந்த விசாரணையில் இதுவரை அடையாளம் காணப்படாத, ஒரு ஆண், ஒரு பெண் என மேலும் இரண்டு சந்தேக நபர்களை காவல்துறையினர் தேடி வருகின்றனர்.
இந்த இரண்டு சம்பவங்களுக்கு இடையே ஒரு “பொதுவான தொடர்பு” இருப்பதாகவும், கைது செய்யப்பட்டவர்கள் ஒன்று அல்லது இரண்டு தாக்குதல்களிலும் ஈடுபட்டிருக்கலாம் எனவும் Toronto காவல்துறை தலைமை கண்காணிப்பாளர் Katherine Stephenson கூறினார்.
இந்த விசாரணையின் போது திரட்டப்பட்ட ஆதாரங்களின் அடிப்படையில், யூத சமூகத்தினர் திட்டமிட்டு குறி வைக்கப்பட்டதாக Katherine Stephenson கூறினார்.
