Fairview வணிக வளாகத்தில் நடந்த துப்பாக்கிச் சூட்டு சம்பவத்தில் தொடர்புடைய சந்தேக நபரை Toronto காவல்துறை அடையாளம் கண்டுள்ளது.
செவ்வாய்க்கிழமை (22) காலை North York வணிக வளாகம் ஒன்றில் நடந்த நகைக்கடை கொள்ளை முயற்சியின்போது, தன்னை எதிர்கொண்ட பாதுகாப்பு ஊழியரை சுட்டதாக சந்தேகிக்கப்படும் Montreal நபர் ஒருவர் தேடப்பட்டு வருகிறார்.
சந்தேக நபர் 53 வயதான Kyle Douglas என அடையாளம் காணப்பட்டுள்ளார்.
அவர் கணிசமான அளவு நகைகளை திருடிச் சென்றதாக தெரிவித்த காவல்துறையினர், திருடப்பட்ட பொருட்களின் மதிப்பு குறித்து விபரங்கள் எதையும் வெளியிடவில்லை.
சந்தேக நபர் தனியாகவே செயல்பட்டதாக புலனாய்வாளர்கள் நம்புகின்றனர்.
இவருக்கு Toronto, Vancouver நகரங்களுக்குத் தொடர்புகள் இருப்பதாகவும், August 2023-இல் Durham பிராந்தியத்தில் நடந்த ஒரு கொள்ளைச் சம்பவம் தொடர்பான விசாரணையில் அவர் தேடப்பட்டு வருவதாகவும் காவல்துறை தெரிவித்துள்ளது.
Fairview வணிக வளாக நகைக்கடையின் பாதுகாப்பு ஊழியர் செவ்வாய்க்கிழமை துப்பாக்கி சூட்டுக்கு இலக்கானார்.
கொள்ளைச் சம்பவத்தில் ஈடுபட்ட சந்தேக நபரை எதிர்கொண்டபோது இந்த பாதுகாப்பு ஊழியர் சுடப்பட்டதாக தெரியவருகிறது.
இதில் பாதுகாப்பு ஊழியர் ஒருவர் உயிருக்கு ஆபத்தான காயங்களுக்கு உள்ளானதாக காவல்துறையினர் தெரிவிக்கின்றனர்.
Sheppard Avenue – Don Mills Road அருகே அமைந்துள்ள Fairview வணிக வளாகத்தில், காலை 10 மணியளவில் இந்த துப்பாக்கிச் சூட்டுச் சம்பவம் நிகழ்ந்தது.
இந்தச் சம்பவம் குறித்து Toronto காவல்துறையினர் விசாரணைகள் தொடர்கின்றன.
