NATO இராணுவ தலைமையகத்திற்கு வெளியே குடிபோதையில் இருந்த கனடிய நபருக்கு சிறை தண்டனை விதிக்கப்பட்டது.
பெல்ஜியத்தில் உள்ள NATO இராணுவத் தலைமையகத்திற்கு வெளியே வாகனத்தில் குடிபோதையில் இருந்த கனடிய நபருக்கு கனடிய இராணுவ நீதிமன்றம் 30 நாட்கள் சிறை தண்டனை விதித்துள்ளது.
இவர் 63 வயதான Doug Allison என அடையாளம் காணப்பட்டார்.
இவர் கனடிய ஆயுதப் படைகளில் உறுப்பினராக இல்லாவிட்டாலும், பெல்ஜியன் சட்டத்தின் கீழ் எந்தக் குற்றத்தையும் செய்யாவிட்டாலும் இந்த சிறைத்தண்டனை விதிக்கப்பட்டுள்ளது.
பெல்ஜியத்தில் வசிக்கும் ஒரு குடிமகனாக கனடாவின் இராணுவ நீதி முறைக்கு தன் மீது எந்த அதிகார வரம்பும் கொண்டிருக்கவில்லை என குற்றவாளி என நிரூபிக்கப்படுவதற்கு முன்னர் அவர் வாதிட்டார்.
இவரது துணைவியார் NATO தலைமையகத்தில் பொது விவகார அதிகாரியாகப் பணியாற்றி வருகிறார் என தெரியவருகிறது.
கனடியப் படையில் பணியாற்றிய இவர், ஆண்டின் ஆரம்பத்தில் பெல்ஜியத்திற்குச் செல்வதற்கு முன்னர் ஓய்வு பெற்றிருந்தார் என்பது குறிப்பிடத்தக்கது.
LJI Reporter ரம்யா சேது
