முன்னாள் துணை பிரதமர் Chrystia Freeland அரசியல் இருந்து அடுத்த ஆண்டு முற்றாக விலக உள்ளார்.
இங்கிலாந்து செல்லவுள்ள அவர் அங்கு கல்வி தொண்டு நிறுவனமான Rhodes அறக்கட்டளையை நிர்வகிக்கும் புதிய பதவியை ஏற்க உள்ளார்.
Liberal நாடாளுமன்ற உறுப்பினரான அவர், அடுத்த வருடம் கோடையில் Rhodes அறக்கட்டளையை நிர்வகிக்கும் புதிய பதவியை ஏற்க உள்ளதாக அந்த கல்வி தொண்டு நிறுவனம் தெரிவித்துள்ளது.
அடுத்த ஆண்டு July 1-ஆம் திகதி முதல் Rhodes அறக்கட்டளையின் தலைமை நிர்வாக அதிகாரியாக Chrystia Freeland நியமிக்கப்பட்டுள்ளதாக புதன்கிழமை (19) அறிவிக்கப்பட்டது.
இந்த தொண்டு நிறுவனம் அதன் மதிப்புமிக்க Rhodes உதவித்தொகைக்கு பிரபலமானது.
இது உலகம் முழுவதிலுமிருந்து மாணவர்களுக்கு Oxford பல்கலைக்கழகத்தில் கல்வி கற்ற வாய்ப்பளிக்கிறது.
முன்னாள் நிதியமைச்சர் Chrystia Freeland இந்த ஆண்டின் ஆரம்பத்தில் Liberal கட்சித் தலைமைக்கும் அதன் மூலம் பிரதமர் பதவிக்கும் போட்டியிட்டார்.
ஆனால் அந்தப் போட்டியில் அவர் பின்னர் பிரதமரான Mark Carney-யிடம் தோல்வியடைந்தார்.
Mark Carney அமைச்சரவையில் உள்நாட்டு வர்த்தக அமைச்சராகவும் போக்குவரத்து அமைச்சராகவும் Chrystia Freeland பணியாற்றினார்,
உள்நாட்டு வர்த்தக அமைச்சராக கனடாவில் உள்நாட்டு வர்த்தக தடைகளை குறைப்பதற்கான முயற்சிகளை அவர் வழிநடத்தினார்.
உக்ரைனின் மறுசீரமைப்பு தொடர்பான விடயங்களில் Mark Carney அரசாங்கத்தைப் பிரதிநிதித்துவப்படுத்தும் சிறப்புப் பங்கு ஏற்க, கடந்த September மாதம் அவர் திடீரென தனது அமைச்சரவை பதவியில் இருந்து விலகினார்.
இந்த நிலையில் அமைச்சரவையில் இருந்து விலகுவதாகவும், அடுத்த தேர்தலில் போட்டியிடப் போவதில்லை எனவும் Chrystia Freeland அறிவித்திருந்தார்.
அடுத்த தேர்தல் வரை நாடாளுமன்ற உறுப்பினராக நீடிக்கும் முடிவையும் அவர் அறிவித்திருந்தார்.
2015-ஆம் ஆண்டு Liberals கட்சி ஆட்சியமைத்ததிலிருந்து Toronto நகர நாடாளுமன்ற உறுப்பினரான Chrystia Freeland முக்கிய பதவிகளை வகித்துள்ளார்.
முன்னாள் பிரதமர் Justin Trudeau அரசில் துணை பிரதமராக பணியாற்றிய அவர், 2020-ஆம் ஆண்டில் நிதி அமைச்சராக நியமிக்கப்பட்ட முதல் பெண்மணி என்ற பெருமையைப் பெற்றார்.
தனது இலையுதிர் கால பொருளாதார அறிக்கையை தாக்கல் செய்வதற்கு சில மணி நேரங்களுக்கு முன்னர், அவர் திடீரென நிதி அமைச்சர் பதவியில் இருந்து விலகியது அதிர்ச்சி அலைகளை ஏற்படுத்தியது.
அவரது பதவி விலகல் Justin Trudeau பதவி விலக வேண்டிய அழுத்தத்தை அதிகரித்தது.
இதன் பின்னணியில் நிகழ்ந்த கட்சி தலைமை போட்டியில் Chrystia Freeland ஈடுபட்டு Mark Carney-யிடம் தோல்வியடைந்தார் என்பது குறிப்பிடத்தக்கது.
LJI Reporter ரம்யா சேது
