Alberta பொது வாக்கெடுப்பில் குடியேற்றக் கட்டுப்பாடுகளுக்கு ஆதரவாக வாக்களிக்கபட்டுள்ளது.
கனடாவின் வரலாற்றில் மிகப்பெரிய அரசியல் திருப்பமாக அமைந்த Alberta மாகாணப் பொது வாக்கெடுப்பு திங்கட்கிழமை (19) நடைபெற்றது.
இதில் மாகாண அரசின் குடியேற்றக் கட்டுப்பாடுகள் குறித்த கேள்விகளுக்கு ‘ஆம்’ என Alberta வாசிகள் வாக்களித்துள்ளனர்.
இந்த வாக்கெடுப்பில் குடியேற்றம், மாகாண சேவைகள் தொடர்பாக மொத்தம் 5 வெவ்வேறு கேள்விகள் கேட்கப்பட்டிருந்தன.
Alberta தேர்தல் திணைக்களத்தின் உத்தியோகப்பற்றற்ற முடிவுகளின்படி, இந்த ஐந்து கேள்விகளுக்கும் Alberta வாக்காளர்கள் ஆம்’ என பெரும்பான்மையாக வாக்களித்துள்ளனர்.
• கேள்வி 1 (குடியேற்றத்தை குறைக்க மாகாண அரசுக்கு கூடுதல் அதிகாரம்): 55.74% பேர் ஆதரவு.
• கேள்வி 2 (மாகாண அரசின் கல்வி, சுகாதாரச் சலுகைகளை கனடிய குடிமக்கள்/நிரந்தர குடியிருப்பாளர்களுக்கு மட்டும் என வரம்புக்கு உட்படுத்துதல்): 56.50% பேர் ஆதரவு.
• கேள்வி 3 (தற்காலிகக் குடியேறிகள் சமூக நலத்திட்டங்களை பெற 12 மாதங்கள் Alberta மாகாணத்தில் வசித்திருக்க வேண்டும்): 58.44% பேர் ஆதரவு.
• கேள்வி 4 (தற்காலிக விசாக்களில் உள்ளவர்கள் பொதுக் கல்வி, சுகாதாரத்தை பயன்படுத்த கூடுதல் கட்டணம் வசூலிப்பது): 57.12% பேர் ஆதரவு.
• கேள்வி 5 (மாகாண தேர்தல்களில் வாக்களிக்க குடியுரிமைக்கான சான்றை கட்டாயமாக்குதல்): 63.22% பேர் ஆதரவு – இதற்கு மிக அதிகமான ஆதரவு கிடைத்துள்ளது.
இந்த நிலையில் குடியேற்றக் கொள்கைகளில் மாகாணங்களின் கவலைகளையும், மக்களின் குரலையும் மதிப்பதாக பிரதமர் Mark Carney கூறினார்.
ஏற்கனவே தற்காலிக வெளிநாட்டுத் தொழிலாளர்கள், சர்வதேச மாணவர்களின் எண்ணிக்கையை குறைத்து, குடியேற்றத்தை முறைப்படுத்தும் பணிகளை தனது அரசாங்கம் ஆரம்பித்துள்ளதை அவர் சுட்டிக்காட்டினார்.
இனிவரும் காலங்களில் Alberta மாகாணத்தின் தேவைகளுக்கு ஏற்ப, அவர்களுடன் இணைந்து குடியேற்றக் கொள்கைகளை மேலும் வலுப்படுத்துவோம் எனவும் பிரதமர் செய்தியாளர்களிடம் தெரிவித்தார்.
மத்திய அரசுக்குத் தகுந்த நெருக்கடி கொடுத்து மாகாணத்திற்கான கூடுதல் அதிகாரங்களை பெற குடியேற்றம் குறித்த கேள்விக்கு ஆதரவாக வாக்களிக்க வேண்டும் என ஏற்கனவே Alberta முதல்வர் Danielle Smith பிரச்சாரம் செய்திருந்தார்.
இந்த நிலையில் மத்திய அரசின் தவறான குடியேற்றக் கொள்கைகளுக்கு Alberta மக்கள் தகுந்த பாடம் புகட்டியுள்ளனர் என தேர்தல் முடிவுகள் குறித்து எதிர்க்கட்சித் தலைவர் Pierre Poilievre தெரிவித்தார்.
கடந்த பத்து ஆண்டுகளாக மத்திய அரசு கையாண்டு வரும் “முறையற்ற, கட்டுப்பாடற்ற பெருமளவிலான குடியேற்ற கொள்கைக்கு” மக்களின் எதிர்ப்பு இதுவாகும் எனவும் செய்தியாளர் சந்திப்பில் அவர் தெரிவித்தார்.
