Toronto நகர முதல்வர் தேர்தலுக்கான வாக்குப்பதிவு நெருங்கி வரும் வேளையில், தற்போதைய முதல்வர் Olivia Chow, அவரது பிரதான எதிர் வேட்பாளர் நகரசபை உறுப்பினர் Brad Bradford ஆகியோருக்கு இடையே போட்டி மிகவும் தீவிரமடைந்துள்ளதாக சமீபத்திய கருத்துக் கணிப்புகள் தெரிவிக்கின்றன.
முன்னாள் அமைச்சர் Chris Alexander போட்டியில் இருந்து விலகியதை அடுத்து, இந்த இரு முனைப் போட்டி மேலும் சூடுபிடித்துள்ளது.
October 6 ,7 ஆம் திகதிகளில் நடத்தப்பட்டு 9 ஆம் திகதி வெளியிடப்பட்ட Mainstreet Research ஆய்வின்படி, இரு வேட்பாளர்களும் மிக நெருக்கமான வாக்கு சதவீதத்துடன் சமபலத்தில் உள்ளனர்.
• Olivia Chow: 40.8% ஆதரவு
• Brad Bradford: 38.3% ஆதரவு
• முடிவெடுக்காதவர்கள்: 10%
இதில் வாக்களிக்க முடிவு செய்துள்ள, குறிப்பிட்ட ஒரு வேட்பாளரின் பக்கம் சாயும் வாக்காளர்களிடையே, Olivia Chow 2.9 சதவீத புள்ளிகள் மட்டுமே முன்னிலையில் இருப்பதாக Mainstreet Research நிறுவனம் தெரிவித்துள்ளது.
நகர முதல்வர் வேட்பாளர்களுக்கான விவாதத்திற்கு பின்னர், October 6 தொலைபேசி வாயிலாக Forum Research Inc.நடத்திய கருத்துக்கணிப்பில் இருவருக்குமான இடைவெளி ஒற்றை இலக்கமாகக் குறைந்துள்ளது.
• Olivia Chow: 46% ஆதரவு
• Brad Bradford: 42% ஆதரவு
• இதர வேட்பாளர்கள்: 12% ஆதரவு
October 5 வாரத்தில் வெளியான Nanos Research பிரத்யேகக் கணிப்பில், தற்போதைய நகர முதல்வர் Olivia Chow சற்று கூடுதல் முன்னிலை பெற்றிருந்தார்.
இதில் Brad Bradford-டை விட Olivia Chow சுமார் 10 சதவீதம் முன்னிலையில் இருந்தார்.
இந்த ஆய்வின் போது சுமார் 22 சதவீத வாக்காளர்கள் யாருக்கு வாக்களிப்பது என இன்னும் முடிவெடுக்காமல் இருந்தனர் என்பது இங்கு குறிப்பிடத்தக்கது.
இந்தத் தேர்தலுக்கான முன்கூட்டிய வாக்குப்பதிவு ஞாயிற்றுக்கிழமையுடன் (11) நிறைவடைந்தது.
அதிகாரப்பூர்வ தேர்தல் நாள் வாக்குப்பதிவு October 26 திங்கட்கிழமை காலை 10 மணி முதல் இரவு 8 மணி வரை நடைபெறும்.
இந்தத் தேர்தலில் Toronto நகர முதல்வர் பதவிக்கு போட்டியிட மொத்தம் 53 வேட்பாளர்கள் அதிகாரப்பூர்வமாக தங்கள் பெயர்களைப் பதிவு செய்துள்ளனர்.
