கனடாவையும் அதன் தலைவர்களையும் குறிவைக்கும் அமெரிக்க ஜனாதிபதியின் விமர்சனங்கள் தொடர்கின்றன.
கனடா பல ஆண்டுகளாக அமெரிக்காவின் முட்டாள்தனமான தலைமைகளை பயன்படுத்தி எங்களை ஏமாற்றி, எங்களிடம் பெரும் ஆதாயம் அடைந்துள்ளது என Donald Trump மீண்டும் விமர்சித்துள்ளார்.
வெள்ளை மாளிகை நிகழ்வு ஒன்றில் புதன்கிழமை (30) அமெரிக்க ஜனாதிபதியின் விமர்சனம் முன்வைக்கப்பட்டது.
அமெரிக்காவின் Hispanic பாரம்பரிய மாத கொண்டாட்ட நிகழ்வு வெள்ளை மாளிகையில் புதன்கிழமை (30) நடைபெற்றது.
அங்கு உரையாற்றிய Donald Trump, கனடா மிகவும் மோசமான நாடு என விமர்சித்தார்.
உலகிலேயே அமெரிக்காவை மிக மோசமாகப் பயன்படுத்திக் கொண்ட நாடு கனடா தான் என குறிப்பிட்ட அவர், கனடிய தலைவர்கள், அமெரிக்காவின் முந்தைய பலவீனமான தலைமைகளை பயன்படுத்தி தங்களை மிகவும் தைரியசாலிகள் போலக் காட்டிக் கொண்டனர் என கூறினார்.
கனடியர்கள் தங்களை முற்றிலும் அப்பாவி போலக் காட்டிக் கொள்கிறார்கள் என மேலும் தெரிவித்த Donald Trump, இப்போது அவர்களுக்கு அமெரிக்கா பொருத்தமான ஒரு சிறிய பாடத்தை கற்பித்துக் கொண்டிருக்கிறது என குறிப்பிட்டார்.
அமெரிக்க ஜனாதிபதியின் இந்த விமர்சனத்திற்கு பதிலளிக்க கனடிய பிரதமர் Mark Carney மறுத்தார்.
British Columbia மாகாணம் Vancouver நகரில் செய்தியாளர்களைச் சந்தித்த Mark Carney, இதற்கு நேரடியாக எந்தப் பதிலையும் கூற விரும்பவில்லை என கூறினார்.
கனடா எப்போதும் தனது இறையாண்மையை பேணி, நல்லெண்ணத்தின் அடிப்படையில் அமெரிக்காவுடன் வர்த்தக பேச்சுவார்த்தைகளை நடத்த தயாராக உள்ளது எனவும் செய்தியாளர்கள் எழுப்பிய கேள்விக்கு பதிலளிக்கையில் Mark Carney தெளிவுபடுத்தியுள்ளார்.
