Salsa on St. Clair துப்பாக்கிச்சூடு சம்பவம் தொடர்பாக, 18 வயதுடைய இரு சந்தேக நபர்கள் கைது செய்யப்பட்டுள்ளனர்.
கடந்த மாதம் Salsa on St. Clair நிகழ்வின் போது நடந்த துப்பாக்கிச் சூட்டில் இரண்டு ஆண்கள் உயிரிழந்ததை தொடர்ந்து, 18 வயதுடைய இருவர் மீது கொலைக் குற்றச்சாட்டு பதிவு செய்யப்பட்டுள்ளது.
கற்பனை செய்ய முடியாத இந்த அதிர்ச்சிகரமான துப்பாக்கிச் சூடு சம்பவத்தால், அச்சமடைந்த ஆயிரக்கணக்கான பங்கேற்பாளர்கள் பாதுகாப்பான இடத்தைத் தேடி ஓடினர் என காவல்துறையினர் கூறினர்.
இதன் எதிரொலியாக மேலும் ஐந்து பேர் காயமடைந்ததாக Toronto காவல் துறைத் தலைவர் Myron Demkiw தெரிவித்துள்ளார்.
பகல் நேரத்தில் நடந்த துப்பாக்கிச் சூடு சம்பவம் தொடர்பாக Jessiah Massaro-Gill, Lewis Downey என அடையாளம் காணப்பட்ட இரு ஆண்கள் மீதும், மொத்தம் 37 குற்றச்சாட்டுகள் சுமத்தப்பட்டுள்ளன.
சந்தேகத்திற்குரிய இருவரும் புதன்கிழமை(5) Toronto-வில் வெவ்வேறு இடங்களில் கைது செய்யப்பட்டனர்.
இந்தத் துப்பாக்கி சூடு July 11 அன்று இரவு சுமார் 8 மணி அளவில், மக்கள் நடமாட்டம் மிகுந்த தெருத் திருவிழாவின் போது நிகழ்ந்தது.
இதில் சந்தேக நபர்கள் இருவர் மீதும் முதல் நிலை கொலைக் குற்றச்சாட்டுகள் இரண்டு, கொலை முயற்சி குற்றச்சாட்டுகள் ஐந்து ஆகியவற்றின் கீழ் வழக்குப்பதிவு செய்யப்பட்டுள்ளது.
இதில் 25 வயதான Shaquan Quashie, 20 வயதான Cesar Vernaza ஆகியோர் பலியாகினர்.
துப்பாக்கிச் சூட்டில் கொல்லப்பட்ட இந்த இருவருமே தாக்குதலின் இலக்காக இருந்ததாக நம்புவதாக காவல்துறைத் தலைவர் தெரிவித்தார்.
இதில் காயமடைந்த ஐவருக்கும் இந்தத் துப்பாக்கிச் சூட்டில் சிக்கிக் கொண்டவர்கள் எனவும் கூறப்படுகிறது.
காயமடைந்த சிலர் தமது “வாழ்க்கையை மாற்றியமைக்கக்கூடிய” காயங்களுக்கு ஆளானதாக கூறப்படுகிறது.
குற்றஞ்சாட்டப்பட்ட இருவருக்கும் இடையிலான உறவு அல்லது பாதிக்கப்பட்ட இருவருடன் அவர்களுக்கு இருக்கக்கூடிய சாத்தியமான தொடர்பு குறித்து விசாரணை அதிகாரி கருத்து தெரிவிக்கவில்லை.
இதில் கைதான இருவருக்கும் எதிரான குற்றசாட்டுகள் எதுவும் இதுவரை நீதிமன்றத்தில் நிரூபிக்கப்படவில்லை.
