அமெரிக்க வர்த்தக பேச்சுவார்த்தையின் அடுத்த கட்ட நடவடிக்கைகள் குறித்து கனடிய அரசிடம் நீடிக்கும் நிச்சயமற்ற தன்மை?

அமெரிக்காவுடன் வர்த்தக பேச்சுவார்த்தைகளின் அடுத்தகட்ட நடவடிக்கைகள் குறித்து குறிப்பிடத்தக்க நிச்சயமற்ற தன்மை நீடிப்பதாக கனடிய அரசாங்கம் கூறுகிறது.

கனடா-அமெரிக்க வர்த்தக அமைச்சர் Dominic LeBlanc வெள்ளிக்கிழமை (03) கனடிய ஊடகங்களுடன் நடத்திய தொலைபேசி வாயிலான நேர்காணல் ஒன்றில் இதனை தெரிவித்தார்.

வருடாந்த மறு ஆய்வு நடைமுறை குறித்து எதையும் முன்கூட்டியே கணிக்க முடியவில்லை என தெரிவித்த Dominic LeBlanc, இது இதுவரை அறியப்படாத ஒரு புதிய சூழலாகும் எனவும் இத்தகைய ஒப்பந்தங்களில் இது வழக்கமான ஒன்றல்ல எனவும் கூறினார்.

கனடா-அமெரிக்கா-Mexico ஒப்பந்தத்தை அதன் தற்போதைய வடிவிலேயே 2042-ஆம் ஆண்டு வரை புதுப்பிப்பதற்கு பதிலாக, அதற்கு ஆண்டுதோறும் மறு ஆய்வு தேவை என Donald Trump நிர்வாகம் முடிவெடுத்த சில நாட்களுக்குப் பின்னர் கனடிய அதிகாரிகளின் இந்தக் கருத்து வெளியானது.

ஆண்டுதோறும் நடைபெறும் மறு ஆய்வின் ஒரு பகுதியாக, விவாதங்களை எவ்வாறு வடிவமைக்க திட்டமிட்டுள்ளார் என அமெரிக்க வர்த்தக பிரதிநிதி Jamieson Greer-ரிடம் கேட்டதாக Dominic LeBlanc கூறினார்.

México பொருளாதாரச் செயலாளர் Marcelo Ebrard-டுடன் இணைந்து இந்த வேண்டுகோள் விடுக்கப்பட்டதாக அவர் கூறினார்.

July 1 முத்தரப்பு சந்திப்பில் அதற்கான பதில் கிடைக்கவில்லை என கூறிய வரும் வாரங்களில் இது குறித்த பேச்சுவார்த்தையைத் தொடர்வது என ஒப்புக் கொள்ளப்பட்டதாகவும்  அமைச்சர் Dominic LeBlanc தெரிவித்தார்.

CUSMA ஒப்பந்தம் மேலும் 16 ஆண்டுகளுக்கு நீடிக்கும் என கனடாவும் Mexico-வும் எதிர்பார்த்திருந்தன.

ஆனால் ஒப்பந்தத்தின் தற்போதைய வடிவம் தனது காலத்தைக் கடந்து விட்டதாக கூறி, அதில் மாற்றங்களை மேற்கொள்ள அமெரிக்கா விரும்புகிறது.