North York அடுக்குமாடி குடியிருப்பு ஒன்றில் நடந்த துப்பாக்கிச் சண்டையில் சுட்டுக் கொல்லப்பட்ட Toronto காவல்துறை அதிகாரி Toronto நகரில் நிகழ்ந்த பல துப்பாக்கிச் சூடுகள் தொடர்பாக தேடுதல் ஆணைகளை செயல்படுத்தும் அவசரகால பணிக்குழுவில் அங்கம் வகித்து வந்தவர் என தெரியவருகிறது.
North York நகரில் வியாழக்கிழமை (11) காலை துப்பாக்கி சூட்டுக்கு உள்ளான காவல்துறை அதிகாரி Sunnybrook மருத்துவமனையில் சிகிச்சை பலனின்றி உயிரிழந்தார்.
அமெரிக்கத் தூதரகத்தில் நடந்த துப்பாக்கிச் சூடு தொடர்பாக விசாரணையை முன்னெடுத்தபோது Toronto காவல்துறை அதிகாரி ஒருவர் சுட்டுக் கொல்லப்பட்டார்.
இதில் பலியான அதிகாரி 43 வயதான Const. Marc Pinizzotto என அடையாளம் காணப்பட்டார்.
Toronto காவல்துறைத் தலைவர் Myron Demkiw செய்தியாளர்களிடம் இதனை உறுதிப்படுத்தினார்.
கடந்த March மாதம் அமெரிக்கத் துணைத் தூதரகத்தில் நடந்த சம்பவம் உட்பட, பல துப்பாக்கிச் சூடு சம்பவங்கள் தொடர்பாக Toronto நகரம் முழுவதும் காவல்துறை அதிகாரிகள் தேடுதல் ஆணைகளை மேற்கொண்டு வருவதாகவும் அவர் உறுதிப்படுத்தினார்.
இதுபோன்ற தருணங்கள், எங்கள் உறுப்பினர்கள் ஒவ்வொரு நாளும் எதிர்கொள்ளும் ஆபத்துகளை நினைவூட்டுகின்றன என Myron Demkiw கூறினார்.
Black Creek and Trethewey சந்திக்கும் பகுதியில் உள்ள Martha Eaton Way தொடர் மாடி கட்டிடத்தில் அதிகாரிகள் சோதனை நடத்தியபோது, அங்கு துப்பாக்கிச் சண்டை நடந்ததாக காவல்துறையினர் தெரிவிக்கின்றனர்.
18 ஆண்டுகள் அனுபவம் கொண்ட காவல்துறை அதிகாரி
இதில் பலியான காவல்துறை அதிகாரி Const. Marc Pinizzotto, Toronto காவல்துறையில் 18 ஆண்டுகள் பணியாற்றிய அனுபவம் வாய்ந்தவர் ஆவார்.
இவர் திருமணமானவர் எனவும், அவருக்கு 14 வயதில் ஒரு ஆண், ஒரு பெண் என இரட்டைக் குழந்தைகள் இருந்தனர் எனவும் தகவலறிந்த வட்டாரங்கள் தெரிவிக்கின்றன.
அவரது தாயார் Linda Pinizzotto ஒரு வீடு விற்பனை முகவராவார்.
அவர் Condo உரிமையாளர்கள் சங்கத்தின் நிறுவனரும் ஆவார்.
அவருடைய சகோதரர்கள் இருவரும் hockey வீரர்கள் ஆவார்கள்.
அவர்களில் ஒருவர் NHL-இல் விளையாடியவர்.
சந்தேக நபர்கள்
இதில் துப்பாக்கிச் சூடு நடத்திய 19 வயதான சந்தேக நபர் மருத்துவமனையில் தீவிர சிகிச்சைப் பிரிவில் சிகிச்சை பெற்று வருகின்றார்.
இந்த சம்பவம் குறித்த Ontario மாகாணத்தின் சிறப்புப் புலனாய்வுப் பிரிவு (SIU) விசாரித்து வருகிறது.
சந்தேக நபர் ஒருவர் பலியான அதிகாரியை நோக்கி ஒரு முறை சுட்டதாகவும், அதனைத் தொடர்ந்து இரண்டாவது அதிகாரி அந்த சந்தேக நபரை பலமுறை சுட்டதாகவும் SIU செய்தித் தொடர்பாளர் Monica Hudon கூறினார்.
இந்த தேடுதல் ஆணைகள் தொடர்பான விசாரணையில், ஒரு சந்தேக நபர் தொடர்ந்து தேடப்பட்டு வருவதாக Toronto காவல்துறைத் தலைவர் Myron Demkiw கூறினார்.
இந்த சந்தேக நபர் 19 வயதான Zara Jabbi என அடையாளம் காணப்பட்டுள்ளார்.
இவரை சரணடையுமாறு வலியுறுத்துவதாக Myron Demkiw மேலும் கூறினார்.
காவல்துறை தலைவர்கள், அரசியல் தலைவர்கள் இரங்கல்
பணியின்போது உயிரிழந்த Toronto காவல்துறை அதிகாரியின் மரணத்தைத் தொடர்ந்து, Toronto பெரும்பாகத்தின் பல காவல்துறை தலைவர்கள், நாடளாவிய ரீதியில் அரசியல் தலைவர்கள் தங்களது இரங்கல்களை தெரிவித்து வருகின்றனர்.
தங்கள் சமூகங்களைப் பாதுகாப்பதற்காக தங்கள் உயிரை அர்ப்பணித்த இந்த துணிச்சல்மிக்க அதிகாரியின் இழப்பிற்காக கனடா துக்கம் அனுசரிக்கிறது என் பிரதமர் Mark Carney தனது இரங்கல் குறிப்பில் தெரிவித்துள்ளார்.
காவல்துறை அதிகாரிகள் எதிர்கொள்ளும் தியாகங்களையும் அபாயங்களையும் நமக்கு உணர்த்தும் ஒரு கசப்பான நினைவூட்டலாக இந்த சம்பவம் அமைந்துள்ளது என Ontario மாகாண முதல்வர் Doug Ford தெரிவித்தார்.
கொல்லப்பட்ட காவல்துறை அதிகாரியின் தாயாரை தனக்கு பல தசாப்தங்களாக தெரியும் என கூறிய Toronto நகரை முதல்வர் Olivia Chow இந்த சம்பவத்திற்கு தனது இரங்கலை தெரிவித்துள்ளார்.
இந்தத் துப்பாக்கிச் சூடு குறித்த செய்தியை “பேரழிவு” என Mississauga நகரே முதல்வர் Carolyn Parrish விவரித்தார்.
