வரவு செலவுத் திட்டத்திற்கு எதிராக வாக்களிக்க நாடாளுமன்ற உறுப்பினர்கள் நிர்பந்திக்கப்படுவார்களா என்பது குறித்து கூற Conservative கட்சி மறுத்துள்ளது.
பிரதமர் Mark Carney அரசின் முதலாவது வரவு செலவு திட்டத்தை நிதி அமைச்சர் François-Philippe Champagne இந்த மாத ஆரம்பத்தில் சமர்பித்தார்.
இந்த வரவு செலவுத் திட்டம் மீதான வாக்களிப்பு அடுத்த வாரம் நடைபெறவுள்ளது.
பெரும்பான்மை அரசாங்கத்திற்கு இரண்டு ஆசனங்கள் குறைவாக உள்ள நிலையில் Liberal அரசாங்கம் இந்த வாக்கெடுப்பை எதிர்கொள்கிறது.
இந்த வரவு செலவுத் திட்டத்திற்கு எதிராக வாக்களிக்க கட்சி வலியுறுத்தப்படுமா என்பதைத் தெரிவிக்க Conservative கட்சித் தலைவர் அலுவலகம் மறுத்துள்ளது.
கட்சியின் நாடாளுமன்ற உறுப்பினர்கள் அனைவரும் வரவு செலவுத் திட்டத்திற்கு எதிராக வாக்களிப்பார்கள் என அவர் நம்பிக்கையுடன் இருக்கிறாரா என்ற செய்தியாளர்களின் கேள்விக்கு நேரடியாக பதிலளிக்க Pierre Poilievre வெள்ளிக்கிழமை (14) மறுத்துவிட்டார்.
கடந்த வாரம் வரவு செலவுத் திட்டம் குறித்த Conservative, Bloc Quebecois கட்சிகளின் திருத்தங்கள் மீதான வாக்கெடுப்பில் நான்கு Conservative நாடாளுமன்ற உறுப்பினர்கள் வாக்களிக்கவில்லை.
இவை நம்பிக்கை வாக்கெடுப்பாக அமைந்திருந்தது குறிப்பிடத்தக்கது.
முன்னாள் Conservative நாடாளுமன்ற உறுப்பினர் Chris d’Entremont கட்சி மாறிய பின்னர், Liberal அரசாங்கம் வரவு செலவுத் திட்ட வாக்கெடுப்புக்கு முன்னதாக பெரும்பான்மைக்கு இரண்டு ஆசனங்கள் மட்டுமே குறைவான நிலையில் உள்ளது.
வரவு செலவுத் திட்டம் மீதான வாக்கெடுப்பு November 17 ஆம் திகதி நம்பிக்கை வாக்கெடுப்பாக அமையவுள்ளது குறிப்பிடத்தக்கது.
திங்கட்கிழமை (17) நடைபெறும் வாக்களிப்பில் சிறுபான்மை Liberal அரசாங்கம் தோல்வியடைந்தால் அது மற்றொரு தேர்தலைத் தூண்டக்கூடிய சாத்தியக்கூறு உள்ளது.
