சிறுபான்மை Liberal அரசின் இலையுதிர் கால வரவு செலவுத் திட்டம் நாடாளுமன்றத்தில் நிறைவேற்றப்படும் என பாதுகாப்பு அமைச்சர் David McGuinty நம்பிக்கை தெரிவித்தார்.
பிரதமர் Mark Carney அரசின் முதலாவது வரவு செலவுத் திட்டம் எதிர்வரும் செவ்வாய்க்கிழமை (04) வெளியாகிறது.
இந்த வரவு செலவுத் திட்டம் நிறைவேற்றப்படுவதற்கு போதுமான வாக்குகளைப் பெறுவது குறித்து சில ஆளும் கட்சி நாடாளுமன்ற உறுப்பினர்கள் சந்தேகம் தெரிவித்துள்ளனர்.
எதிர்க்கட்சிகள் இந்த வரவு செலவுத் திட்டத்திற்கு ஆதரவாக வாக்களிப்பதற்கு உறுதிமொழி வழங்காத நிலையில் அது நிறைவேற்றப்படாமல் போகக்கூடும் என அரசாங்கத்தின் அவைத் தலைவர் Steven MacKinnon எச்சரித்துள்ளார்.
இதனால் நத்தார் விடுமுறை காலத்தில் திடீர் தேர்தல் ஒன்று நடைபெற வாய்ப்பு இருப்பதாக Steven MacKinnon பகிரங்கமாக கவலை தெரிவித்தார்.
ஆனாலும் ஆசிய-Pacific பொருளாதார ஒத்துழைப்பு மன்ற உச்சி மாநாட்டிற்காக பிரதமருடன் தென் கொரியா பயணமாகியுள்ள அமைச்சர் David McGuinty, வரவு செலவுத் திட்டம் நாடாளுமன்றத்தில் நிறைவேறும் என தான் நம்பிக்கையுடன் இருப்பதாக செய்தியாளர்களிடம் கூறினார்.
நாடாளுமன்றத்தில் Liberal அரசாங்கம் 169 ஆசனங்களைக் கொண்டுள்ளனர்.
ஏனைய கட்சிகள் 174 ஆசனங்களைக் கொண்டுள்ளனர்.
Conservative 144, Bloc Québécois 22, NDP 7, பசுமைக் கட்சி ஒன்று என ஆசன பகிர்வு அமைகிறது.
இந்த நிலையில் வரவு செலவுத் திட்டத்தை நிறைவேற்ற, Liberal அரசாங்கம் எதிர்க்கட்சிகளில் ஒன்றின் ஆதரவைப் பெற வேண்டும்.
அல்லது எதிர்க்கட்சி நாடாளுமன்ற உறுப்பினர்கள் சிலர் வாக்கெடுப்பில் பங்கேற்காமல் இருக்க வேண்டும் என்பது குறிப்பிடத்தக்கது.
