Scarborough நகரில் தமிழர்களின் நகைக் கடையில் நிகழ்ந்த கொள்ளை முயற்சியில் கடை உரிமையாளர் காயமடைந்தார் .
இந்த சம்பவம் புதன்கிழமை (29) இரவு நிகழ்ந்தது.
ஐந்து சந்தேக நபர்கள் திருடப்பட்ட வாகனம் ஒன்றை நகைக் கடையினுள் செலுத்தி கொள்ளையடிக்க முயன்தாக Toronto காவல்துறையினர் தெரிவித்தனர்.
Eglinton Avenue East – Brimley Road சந்திப்புகளுக்கு அருகாமையில் உள்ள மயூரா நகையகத்தில் இந்த கொள்ளை முயற்சி முன்னெடுக்கப்பட்டது.
புதன் இரவு முன்னெடுக்கப்பட்ட இந்த நகைக்கடை கொள்ளை முயற்சியின் போது வாகனத்தை ஓட்டிச் சென்ற ஐந்து சந்தேக நபர்களை காவல்துறையினர் தேடி வருகின்றனர்.
இந்த வாகனம் ஒரு எரிவாயு இணைப்பையும் தாக்கியது.
இதனால் குறிப்பிட நகைக்கடை அமைந்திருந்த கடை தொகுதியில் இருந்து அனைவரும் வெளியேற்றப்பட்டனர்.
இந்த சம்பவத்தின் போது கடை உரிமையாளருக்கு சிறிய காயம் ஏற்பட்டது என காவல்துறையினர் கூறினர்.
இதில் சந்தேக நபர்கள் மற்றொரு வாகனத்தில் தப்பிச் சென்றனர்.
இதில் தொடர்புடைய இரண்டு வாகனங்களும் திருடப்பட்டவை எனவும் காவல்துறையினர் தெரிவித்தனர்.
இந்த கொள்ளை முயற்சியில் எந்த பொருட்களும் திருடப்படவில்லை எனவும் தெரியவருகிறது.
இந்த சம்பவம் குறித்து தகவல் அறிந்தவர்கள் தம்மை தொடர்பு கொள்ளுமாறு காவல்துறையினர் கோரியுள்ளனர்.
